નવસારી NMCના મેયર, મ્યુ. કમિશનર અને સ્ટેન્ડિંગ ચેરમેન દ્વારા વિવિધ વિસ્તારોની ફિલ્ડ વિઝિટ

ઇટાળવા તળાવ, GUDC કામગીરી, ચોવીસી આહિરવાસ અને વોર્ડ નં. 13ના વિકાસકામોની સમીક્ષા; રસ્તા-ડ્રેનેજ પ્રશ્નોના નિરાકરણ માટે સૂચનાઓ

નવસારી : નવસારી મહાનગરપાલિકા વિસ્તારમાં ચાલી રહેલી વિવિધ વિકાસલક્ષી કામગીરીની પ્રગતિની સમીક્ષા અને સ્થાનિક પ્રશ્નોના ઝડપી નિરાકરણના હેતુસર મેયર અશોકભાઈ ધોરાજીયા, સ્થાયી સમિતિના ચેરમેન મુકેશભાઈ અગ્રવાલ તથા મ્યુનિસિપલ કમિશનર જયેશ ઉપાધ્યાય દ્વારા વિવિધ વિસ્તારોની ફિલ્ડ વિઝિટ કરવામાં આવી હતી.

વિઝિટ દરમિયાન ઇટાળવા ખાતે GUDC દ્વારા હાથ ધરવામાં આવેલી કામગીરીનું નિરીક્ષણ કરવામાં આવ્યું હતું. ત્યારબાદ ઇટાળવા તળાવ ખાતે ચાલી રહેલા વિકાસકામોની સ્થળ મુલાકાત લઈ અધિકારીઓ પાસેથી કામગીરીની પ્રગતિ અંગે વિગતો મેળવવામાં આવી હતી.

તળાવ અને સંલગ્ન વિકાસકામો સમયમર્યાદામાં તથા ગુણવત્તાસભર રીતે પૂર્ણ થાય તે માટે સંબંધિત એજન્સી અને કોન્ટ્રાક્ટરોને જરૂરી સૂચનાઓ આપવામાં આવી હતી.

ત્યારબાદ ચોવીસી આહિરવાસ અને ધારાનગર ખાતે સ્થાનિક નાગરિકોની રજૂઆતોને ધ્યાને લઈ ડ્રેનેજ તથા રસ્તા સંબંધિત પ્રશ્નોનું સ્થળ પર નિરીક્ષણ કરવામાં આવ્યું હતું. ભાણા પેટ્રોલ પંપ પાસે, શનિદેવ મંદિર નજીક પણ સ્થાનિકોની રજૂઆત અંગે સ્થળ મુલાકાત લઈ સંબંધિત અધિકારીઓને જરૂરી કાર્યવાહી કરવા સૂચના આપવામાં આવી હતી.

સમગ્ર ફિલ્ડ વિઝિટ દરમિયાન નવસારી મહાનગરપાલિકાના નગરસેવકો, ડેપ્યુટી કમિશનર તથા વિવિધ વિભાગોના અધિકારીઓ ઉપસ્થિત રહ્યા હતા.

મહાનગરપાલિકા વિસ્તારમાં ચાલી રહેલા વિકાસકામોમાં જરૂરી સુધારા-વધારા કરીને કામગીરી વધુ વેગવંતી, ગુણવત્તાસભર અને સમયસર પૂર્ણ થાય તે માટે અધિકારીઓ તથા સંબંધિત એજન્સીઓને માર્ગદર્શન આપવામાં આવ્યું હતું.