ગણદેવીના મેંધર ગામે ત્રીજા દિવસે પણ દબાણ હટાવવાની કાર્યવાહી યથાવત

સરકારી જમીન પરના અંદાજે 10 હજાર ચોરસ મીટર વિસ્તારમાં ગેરકાયદેસર દબાણો દૂર કરાયા

નવસારી : નવસારી જિલ્લાના ગણદેવી તાલુકાના દરિયાકાંઠાના મેંધર ગામ ખાતે બ્લોક નં. 903, રી-સર્વે નં. 684ની સરકારી જમીન પર વહીવટી તંત્રની મંજૂરી વિના ગેરકાયદેસર રીતે બનાવવામાં આવેલા ઝીંગા તળાવો અને અન્ય દબાણો દૂર કરવાની કાર્યવાહી સતત ત્રીજા દિવસે પણ ચાલુ રહી હતી.

જિલ્લા કલેક્ટર મનીષ ગુરવાનીના માર્ગદર્શન હેઠળ ચીખલી પ્રાંત અધિકારી, ગણદેવી મામલતદાર તથા સંબંધિત વિભાગોના અધિકારીઓની ટીમ દ્વારા કાર્યવાહી હાથ ધરવામાં આવી હતી. આજે અંદાજે 10 હજાર ચોરસ મીટર જેટલા વિસ્તારમાં થયેલા દબાણો દૂર કરવામાં આવ્યા હતા.

હાલ સરકારી જમીન પરથી ગેરકાયદેસર દબાણો દૂર કરવાની કામગીરી પૂરજોશમાં ચાલી રહી છે. તંત્ર દ્વારા સ્પષ્ટ કરવામાં આવ્યું છે કે સરકારી જમીન પર કોઈપણ પ્રકારનું ગેરકાયદેસર દબાણ ચલાવી લેવામાં આવશે નહીં.

આગામી દિવસોમાં પણ આવી કડક ઝુંબેશ ચાલુ રાખવામાં આવશે અને સરકારી જમીન પર ગેરકાયદેસર દબાણ કરનારાઓ સામે નિયમ મુજબ કાયદેસરની કાર્યવાહી કરવામાં આવશે.