બીલીમોરામાં યુવાનને અજાણી એપ્લીકેશન મોકલી મોબાઈલ હેક કરી 20 હજાર ટ્રાન્સફર કરી લીધા

મોબાઈલનો એક્સેસ મેળવી ખાતામાંથી રૂ. 20 હજાર ઉપાડી લીધા, બીલીમોરા પોલીસ મથકે ફરિયાદ નોંધાઈ

નવસારી : બીલીમોરામાં યુવાનને અજાણી એપ્લીકેશન મોકલી મોબાઈલ હેક કરી 20 હજાર રૂપિયા ટ્રાન્સફર કરી છેતરપીંડી આચરી હોવાનો બનાવ બીલીમોરા પોલીસ મથકે નોંધાયો છે.

મળતી માહિતી મુજબ, મૂળ ગણદેવીના ભાટ ગામે કુવા ફળીયામાં અને હાલ બીલીમોરા સોમનાથ મંદિર પાસે દેસરા રાવલનગરમાં હર્ષવર્ધન રામાભાઈ ટંડેલ તેમના પરિવાર સાથે રહે છે. ગત 5મીએ હર્ષવર્ધનના મિત્ર સાહિલે હર્ષવર્ધન પાસેથી 500 રૂપિયા ઉછીના માંગતા હર્ષવર્ધને 500 રૂપિયા ટ્રાન્સફર કર્યા હતા.

ત્યારબાદ કોઈ અજાણ્યા ઇસમે હર્ષવર્ધનને અજાણી એપ્લીકેશન મોકલી તેનો મોબાઈલ હેક કરી લીધો હતો અને મોબાઈલનો એક્સેસ મેળવી 20 હજાર રૂપિયા ઉપાડી લીધા હતા.

રાત્રે મિત્ર પાર્થે હર્ષવર્ધન પાસેથી 500 રૂપિયા ઉછીના માંગતા તે રૂપિયા ટ્રાન્સફર થયા ન હતા. જેથી હર્ષવર્ધને બેંક એકાઉન્ટમાં ચેક કરતા 20 હજાર રૂપિયા ઉપડી ગયા હોવાનું જાણવા મળ્યું અને સાયબર ફ્રોડ થયું હોવાનું સામે આવ્યું હતું.

આ બાબતે હર્ષવર્ધને બીલીમોરા પોલીસ મથકે અજાણ્યા ઇસમ વિરુદ્ધ ફરિયાદ નોંધાવતા આગળની તપાસ પી.આઈ. કે.એન. સોલંકીએ હાથ ધરી છે.