લોન મંજુર કરાવવાના બહાને 4 લાખ રૂપિયા ટ્રાન્સફર કરાવી નવસારીના આધેડને છેતર્યો

80 લાખની લોન અપાવવાની વાત કરી અલગ-અલગ ચાર્જીસના નામે કુલ રૂ. 4,00,490 ટ્રાન્સફર કરાવ્યા

નવસારી : લોન મંજુર કરાવવાના બહાને અજાણ્યા ઇસમે 4 લાખ રૂપિયા ટ્રાન્સફર કરાવી નવસારીના આધેડ સાથે છેતરપીંડી આચરી હોવાનો બનાવ નવસારી ટાઉન પોલીસ મથકે નોંધાયો છે.

મળતી માહિતી મુજબ, નવસારી પિંજારા મહોલ્લા તંબોલી સ્ટ્રીટ પંચમુખી એપાર્ટમેન્ટમાં રહેતા હબીબભાઈ હાસીમભાઈ ગોધરાવાલા (ઉ.વ. 58) હબીબ એન્ટરપ્રાઈઝ નામની ફેકટરી ચલાવે છે. ગત 18મીએ હબીબભાઈના મોબાઈલ ફોન પર એક અજાણ્યા નંબર પરથી ફોન આવ્યો હતો. ફોન કરનારાએ પોતાનું નામ બલજીન્દર સિંઘ અને કેપિટલ વન ફાયનાન્સમાંથી બોલતો હોવાનું જણાવી લોન અપાવવાની વાત કરી હતી.

બલજીન્દરે હબીબભાઈને કેટલી લોનની જરૂરિયાત છે તેમ પૂછતા તેમણે 80 લાખ રૂપિયાની લોન જોઈએ છે તેમ જણાવ્યું હતું. જેથી બલજીન્દરે લોન સેન્સ્કશન થઈ જશે તેમ કહ્યું હતું. ત્યારબાદ હબીબભાઈએ લોન લેવાનું નક્કી કરતા બલજીન્દરે તેની કંપનીનો બીજો નંબર આપી ડોક્યુમેન્ટ્સ મંગાવ્યા હતા. જેથી હબીબભાઈએ આધાર કાર્ડ, પાન કાર્ડ, આઈટીઆર, ઉદ્યમ સર્ટીફીકેટ, બેંક સ્ટેટમેન્ટ અને જીએસટી નંબર મોકલ્યા હતા.

ત્યારબાદ રીતિકા અને બલજીન્દરે લોનના અલગ-અલગ ચાર્જીસ પેટે પૈસા ટ્રાન્સફર કરવા માટે સ્કેનર મોકલ્યું હતું. જેથી હબીબભાઈ પાસેથી અલગ-અલગ ચાર્જીસ પેટે ટુકડે-ટુકડે કુલ રૂ. 4,00,490 ટ્રાન્સફર કરાવ્યા હતા.

પરંતુ ઘણા દિવસો વીતી ગયા છતાં લોન પાસ કરાવવાની જગ્યાએ રીતિકા અને બલજીન્દર વધુ રૂપિયાની માંગણી કરી રહ્યા હતા. જેથી હબીબભાઈને શંકા જતા વધુ રૂપિયા ટ્રાન્સફર કર્યા ન હતા. આ બાબતે હબીબભાઈએ નવસારી ટાઉન પોલીસ મથકે રીતિકા અને બલજીન્દર નામના ઈસમો વિરુદ્ધ ફરિયાદ નોંધાવતા આગળની તપાસ પી.આઈ. વી.આર. ભરવાડે હાથ ધરી છે.