નવસારીમાં રિક્ષાના નવા ભાડાપત્રકનો કડકાઈથી અમલ કરવા રીક્ષા ચાલકોને સૂચના

મુસાફરો સાથે વિવાદ ટાળવા અને નિયમભંગ કરનાર ચાલકો સામે કડક પગલાંની એસોસિએશનની ચીમકી

નવસારી: નવસારી શહેર અને આજુબાજુના વિસ્તારમાં દોડતી તમામ ઓટોરિક્ષાઓ માટે એસોસિએશન દ્વારા નવું ભાડાપત્રક જાહેર કરી આજથી અમલવારી શરૂ કરવામાં આવી છે. ત્યારે રીક્ષા ચાલકોએ નિર્ધારિત ભાડાની રકમ જ વસૂલવા તેમજ મુસાફરો સાથે વિવાદ ટાળવાની સૂચના આપવામાં આવી છે. જો કોઈ રીક્ષા ચાલક નિયમભંગ કરશે તો તેની સામે કડક પગલાં ભરવાની ચીમકી રીક્ષા એસોસિએશન દ્વારા ઉચ્ચારાઈ છે.

સીએનજી ગેસના વધેલા ભાવ તેમજ રીક્ષા રીપેરીંગ અને રીક્ષા પાર્ટ્સમાં થયેલા ભાવવધારાને કારણે રીક્ષા ચાલકોને આર્થિક બોજો સહન કરવો પડી રહ્યો હતો. જેથી મોંઘવારીના મારથી બચવા માટે નવસારી રીક્ષા એસોસિએશન દ્વારા રેગ્યુલર ભાડાના દરમાં 5 રૂપિયાનો વધારો કરી નવું ભાડાપત્રક જાહેર કરવામાં આવ્યું છે. આ નવા ભાડા મુજબ જ રીક્ષા ચાલકોએ મુસાફરો પાસેથી ભાડું વસૂલવા માટે આજથી અમલવારી શરૂ કરવામાં આવી છે.

બીજી તરફ ક્યારેક ભાડાના મુદ્દે રીક્ષા ચાલકો અને મુસાફરો વચ્ચે રકઝક થતી હોય છે. જેથી રીક્ષા એસોસિએશન દ્વારા રીક્ષા ચાલકોને મુસાફરો સાથે કોઈપણ પ્રકારની જીભાજોડી કે તકરાર ન કરવા તાકીદ કરવામાં આવી છે. તેમજ મુસાફરોને મોંઘવારી અને ગેસના ભાવવધારાની વાસ્તવિકતા શાંતિપૂર્વક સમજાવીને સહકાર મેળવવાનો રહેશે.

આ ઉપરાંત કોઈ રીક્ષા ચાલક ભાડું ઓછું લઈ મુસાફરોને બેસાડે અને નક્કી કરેલા ભાડાના દરને તોડવાનો પ્રયાસ કરે તો પહેલા તેને સમજાવવાનો પ્રયાસ કરવામાં આવશે. પરંતુ જો કોઈ રીક્ષા ચાલક માથાકૂટ કરશે અથવા નિયમોનું ઉલ્લંઘન કરશે તો તેનો વાહન નંબર તાત્કાલિક એસોસિએશનને સોંપવાનો રહેશે. ત્યારબાદ નિયમભંગ કરનાર રીક્ષા ચાલક સામે રીક્ષા એસોસિએશન દ્વારા કાયદેસરની કડક કાર્યવાહી હાથ ધરવામાં આવશે તેવી ચીમકી ઉચ્ચારવામાં આવી છે.