ચીખલી APMCની 10 બેઠકો માટે યોજાયેલી ચૂંટણીમાં 98.09 ટકા રેકોર્ડબ્રેક મતદાન

367માંથી 360 મતદારોએ મતાધિકારનો ઉપયોગ કર્યો; 20 ઉમેદવારોનું ભાવી મતપેટીમાં સીલ, આજે મતગણતરી બાદ પરિણામ સ્પષ્ટ થશે

નવસારી : ચીખલી ખેતી ઉત્પન્ન બજાર સમિતિની સામાન્ય ચૂંટણીમાં કુલ 14 બેઠકો માટે ચૂંટણી પ્રક્રિયા હાથ ધરવામાં આવી હતી. જેમાં વેપારી વિભાગની 4 બેઠકો માટે ફોર્મ ખેંચવાના દિવસે જ સહકાર પેનલના ઉમેદવારો બિનહરીફ ચૂંટાઈ આવ્યા હતા. આ સાથે સહકાર પેનલે ચાર બેઠકો પર કબ્જો જમાવી મજબૂત શરૂઆત કરી હતી.

બાકી રહેલી ખેડૂત વિભાગની 10 બેઠકો માટે બુધવારે મતદાન યોજાયું હતું. કુલ 367 નોંધાયેલા મતદારોમાંથી 360 મતદારોએ પોતાના મતાધિકારનો ઉપયોગ કરતાં 98.09 ટકા જેટલું રેકોર્ડબ્રેક મતદાન નોંધાયું હતું.

સવારથી જ મતદાન મથકો પર મતદારોની લાંબી લાઈનો જોવા મળી હતી. કડક સુરક્ષા વ્યવસ્થા વચ્ચે શાંતિપૂર્ણ વાતાવરણમાં મતદાન પ્રક્રિયા પૂર્ણ થઈ હતી. સાંજે પાંચ વાગ્યે મતદાન પૂર્ણ થતાં 20 ઉમેદવારોનું રાજકીય ભાવી મતપેટીમાં સીલ થઈ ગયું હતું.

વિક્રમી મતદાનને કારણે ચૂંટણીને લઈને રાજકીય ગરમાવો વધ્યો છે. બંને પક્ષોના ઉમેદવારો પોતાના સંપૂર્ણ વિજયનો વિશ્વાસ વ્યક્ત કરી રહ્યા છે. જોકે, 10 બેઠકો માટેની મતગણતરી બાદ જ કઈ પેનલને બહુમતી મળે છે તે સ્પષ્ટ થશે.