ચીખલીના તલાવચોરા રોડ પર ફરી દબાણો, ટ્રાફિક જામથી વાહનચાલકો પરેશાન

સબ-ડિસ્ટ્રિક્ટ હોસ્પિટલના લોકાર્પણ પહેલાં હટાવેલી લારીઓ અઠવાડિયામાં ફરી ગોઠવાઈ; દબાણો સામે સમાન નીતિ અને નાના વેપારીઓ માટે વૈકલ્પિક વ્યવસ્થાની માંગ

ચીખલીના તલાવચોરા રોડ પર ફળ-શાકભાજીની લારીઓ અને ગલ્લાઓ ફરી ગોઠવાઈ જતાં વાહનચાલકો માટે ટ્રાફિકની સમસ્યા સર્જાઈ છે. થોડા દિવસ પહેલાં દબાણો હટાવાયા બાદ ફરી લારી-ગલ્લા ગોઠવાતાં તંત્રની કામગીરી સામે સવાલો ઊઠ્યા છે.

ચીખલીમાં સબ-ડિસ્ટ્રિક્ટ હોસ્પિટલના લોકાર્પણ કાર્યક્રમ પહેલાં માર્ગ મકાન વિભાગે હાઇવે ચાર રસ્તા, ડેપો સર્કલથી બગલાદેવ સર્કલ તેમજ ડેપો સર્કલથી તલાવચોરા રોડ પરથી લારી-ગલ્લા હટાવ્યા હતા. જોકે કાર્યક્રમ પૂર્ણ થયાના અઠવાડિયામાં જ તલાવચોરા રોડ પર માર્ગ મકાન વિભાગની કચેરી નજીક અને કુમાર-કન્યા શાળા પાસે ફળ-શાકભાજીની લારીઓ ફરી ગોઠવાઈ ગઈ છે.

આ લારીઓને કારણે વાહનોની અવરજવરમાં અડચણ ઊભી થતી હોવાની ફરિયાદો વાહનચાલકો કરી રહ્યા છે. હાઇવે ચાર રસ્તાથી બગલાદેવ સર્કલ વચ્ચેના મુખ્ય માર્ગ પર પણ કેટલીક ફળની લારીઓ ફરી જોવા મળી રહી છે. બીજી તરફ, ડેપો સર્કલ પાસે રિક્ષા સ્ટેન્ડ પાછળ વર્ષોથી નાના-મોટા ધંધા કરીને રોજગાર મેળવતા કેટલાક લારી-ગલ્લાવાળાઓને પણ હટાવવામાં આવ્યા છે.

ટ્રાફિકને નડતરરૂપ દબાણો ફરી ઊભાં થઈ રહ્યાં છે, જ્યારે નડતરરૂપ ન હોય તેવા લારી-ગલ્લાવાળાઓ સામે કાર્યવાહી થતી હોવાના આક્ષેપો થઈ રહ્યા છે. સ્થાનિકોએ દબાણો અંગે એકસરખો માપદંડ અને સ્પષ્ટ નીતિ અમલમાં મૂકવાની માંગ કરી છે. સાથે જ મુખ્ય માર્ગો પર ટ્રાફિકને અડચણરૂપ દબાણો સામે નિયમિત કાર્યવાહી કરવા અને નાના વેપારીઓના રોજગારને ધ્યાનમાં રાખીને યોગ્ય વૈકલ્પિક વ્યવસ્થા ઉપલબ્ધ કરાવવાની માંગ પણ ઊઠી છે.