નવસારીના પેરા ગામે દીપડો દેખાતાં સ્થાનિકોમાં ભયનો માહોલ

પાંચ બંગલા વિસ્તારમાં કૂતરાનો પીછો કરતો દીપડો સીસીટીવીમાં કેદ; વન વિભાગે પાંજરું ગોઠવવાની કાર્યવાહી હાથ ધરી

નવસારી તાલુકાના પેરા ગામે મોડી રાત્રે દીપડો દેખાતાં ગ્રામજનોમાં ફફડાટ ફેલાયો છે. ગામથી વાઘેચા ગામ તરફ જતા મુખ્ય રસ્તા પર આવેલા પાંચ બંગલા વિસ્તાર નજીક કૂતરાનો પીછો કરતો દીપડો સીસીટીવી કેમેરામાં કેદ થયો હતો.

નવસારી જિલ્લામાં છેલ્લા થોડા સમયથી દીપડા દેખાવાની ઘટનાઓ સામે આવી રહી છે. ખાસ કરીને વાંસદા, ચીખલી અને નવસારી તાલુકાનાં ગામોમાં રહેણાંક વિસ્તારોમાં દીપડાની અવરજવરથી સ્થાનિકોમાં ભય જોવા મળી રહ્યો છે. રાત્રિના સમયે ખોરાકની શોધમાં દીપડા આવતા હોવાથી ખેડૂતો પણ ખેતરમાં જવાનું ટાળી રહ્યા છે.

પેરા ગામના પાંચ બંગલા વિસ્તારમાં કેટલાક પરિવારો રહે છે. ગત મોડી રાત્રે અચાનક કૂતરાઓના ભસવાના અને દોડવાના અવાજો સંભળાતાં નજીકના એક પરિવારના સભ્યો જાગી ગયા હતા. તેમણે બહાર નીકળીને તપાસ કરી હતી, પરંતુ કોઈ નજરે પડ્યું ન હતું.

ત્યારબાદ ઘરની બહાર લગાવેલા સીસીટીવી કેમેરાના ફૂટેજ તપાસતાં દીપડો કૂતરાઓ પાછળ દોડતો દેખાયો હતો. આ દૃશ્યો જોઈ પરિવારજનો ગભરાઈ ગયા હતા. દીપડો બાદમાં નજીકના શેરડી સહિતના પાકવાળા ખેતરમાં જતો રહ્યો હતો.

ઘટનાની જાણ થતાં આસપાસના ગ્રામજનોએ તાત્કાલિક વન વિભાગને જાણ કરી હતી. વન વિભાગની ટીમે સ્થળ પર પહોંચીને આસપાસના વિસ્તારમાં તપાસ કરી હતી. દીપડાની અવરજવરના સંભવિત માર્ગોને ધ્યાનમાં રાખીને યોગ્ય સ્થળે પાંજરું ગોઠવવાની કાર્યવાહી હાથ ધરવામાં આવી હતી.