ઇટાળવા–ગણેશ સિસોદ્રા રોડ પર નીલ કોમ્પલેક્ષના બાંધકામને લઈ વિવાદ

આદિવાસીની જમીન પર કબજો અને ખેતીની જમીન પર પરવાનગી વિના બાંધકામના સ્થાનિકોના આક્ષેપો; મામલતદાર દ્વારા તપાસની માંગ

નવસારી મહાનગરપાલિકા વિસ્તારમાં આવેલા ઇટાળવા–ગણેશ સિસોદ્રા રોડ પર નીલ કોમ્પલેક્ષ નામના શોપિંગ સેન્ટરના બાંધકામને લઈને વિવાદ ઊભો થયો છે. સ્થાનિકોએ આક્ષેપ કર્યો છે કે, કોમ્પલેક્ષનો એક ભાગ ઇટાળવા ગામના પૂર્વ સરપંચે આદિવાસી રહીશની જમીન પર અને બીજો ભાગ એક બિલ્ડરે જૂની શરતની ખેતીની જમીન પર બાંધ્યો છે.

શોપિંગ સેન્ટરમાં દુકાનો, રેસ્ટોરન્ટ અને વચ્ચેના ભાગમાં લિફ્ટ આવેલી છે. સમગ્ર બાંધકામ એકસરખું દેખાતું હોવા છતાં લિફ્ટની બંને બાજુના ભાગો અલગ-અલગ જમીન પર બે વ્યક્તિઓ દ્વારા બાંધવામાં આવ્યા હોવાનો સ્થાનિકોનો દાવો છે. બે અલગ જમીનો પર એક જ શોપિંગ કોમ્પલેક્ષનું બાંધકામ કેવી રીતે કરવામાં આવ્યું તે અંગે તેમણે સવાલો ઉઠાવ્યા છે.

સ્થાનિકોના આક્ષેપ મુજબ, લિફ્ટની જમણી બાજુનું બાંધકામ બિલ્ડરે જૂની શરતની ખેતીની જમીન પર જરૂરી પરવાનગી વિના કર્યું છે. બીજી બાજુ, કલમ ૭૩-એએ હેઠળની આદિવાસી રહીશની જમીન પર પૂર્વ સરપંચે ગેરકાયદેસર બાંધકામ કરીને કબજો કર્યો હોવાનો આરોપ છે. જમીનના બિનખેતી રૂપાંતર અને બાંધકામની મંજૂરી અંગે તપાસ કરીને સત્ય હકીકત બહાર લાવવાની માંગ ઊઠી છે.

ઇટાળવા વિસ્તાર મહાનગરપાલિકામાં સામેલ થયો તે પહેલાં ગ્રામ પંચાયત હસ્તક હતો. સ્થાનિકોએ આક્ષેપ કર્યો છે કે, આશરે ૧૦ વર્ષ અગાઉ પૂર્વ સરપંચ અને તત્કાલીન તલાટીની સંડોવણીથી આદિવાસી રહીશની જમીન પર બાંધકામ કરવામાં આવ્યું હતું. બાંધકામની આકારણી માટે કાગળ પર કોમ્પલેક્ષની બાજુની જમીન દર્શાવી ગેરરીતિ આચરવામાં આવી હોવાના પણ આક્ષેપો થયા છે.

સ્થાનિકોએ કોમ્પલેક્ષના બાંધકામને ગેરકાયદેસર ગણાવી તેને તોડી પાડવાની માંગ કરી છે. સમગ્ર મામલે નવસારી શહેર મામલતદાર દ્વારા જમીનના રેકોર્ડ, આકારણી અને બાંધકામની પરવાનગીઓની તપાસ કરવામાં આવે તેવી માંગ ઉઠાવવામાં આવી છે.