સેવા સંકલ્પ અભિયાન અંતર્ગત અંજનકુંડ ખાતે સફાઈ ઝુંબેશ યોજાઈ

વિશ્વ પ્રવાસન દિન નિમિત્તે ૫૦૦થી વધુ લોકો જોડાયા; અંજનકુંડથી ધોધ સુધીના ૧.૫ કિ.મી. વિસ્તારમાંથી પ્લાસ્ટિક સહિતનો કચરો એકત્રિત કરાયો

ડાંગ જિલ્લાના આહવા તાલુકાના અંજનકુંડ ખાતે ૨૭ સપ્ટેમ્બરે વિશ્વ પ્રવાસન દિન નિમિત્તે જિલ્લા વહીવટી તંત્ર દ્વારા મહા સફાઈ અભિયાન યોજાયું હતું. વડાપ્રધાન નરેન્દ્રભાઈ મોદીના સેવા, સમર્પણ અને સુશાસનના ૨૫ વર્ષ પૂર્ણ થવાના અવસરે ચાલી રહેલા સેવા સંકલ્પ અભિયાન અંતર્ગત આ આયોજન કરવામાં આવ્યું હતું.

સ્વચ્છ ભારત મિશન અને જિલ્લાના પ્રવાસન સ્થળોને સ્વચ્છ રાખવાના સંદેશ સાથે યોજાયેલા અભિયાનમાં ગુજરાત વિધાનસભાના નાયબ મુખ્ય દંડક વિજયભાઈ પટેલ, જિલ્લા કલેક્ટર એન.ડી. પરમાર, જિલ્લા વિકાસ અધિકારી કુલદીપસિંહ ઝાલા સહિત ઉચ્ચ અધિકારીઓ, સ્થાનિક પદાધિકારીઓ, સુરક્ષાકર્મીઓ, વનકર્મીઓ, ગ્રામજનો અને કોલેજના વિદ્યાર્થીઓ મળી ૫૦૦થી વધુ લોકો જોડાયા હતા. સૌએ અંજનકુંડથી ધોધ સુધીના આશરે ૧.૫ કિ.મી. વિસ્તારમાં સફાઈ હાથ ધરી હતી.

આ પ્રસંગે નાયબ મુખ્ય દંડક અને ધારાસભ્ય વિજયભાઈ પટેલે સમગ્ર જિલ્લાને સ્વચ્છ અને સ્વસ્થ રાખવા નાગરિકોને સ્વચ્છતા અભિયાનમાં સક્રિય સહભાગી બનવા અપીલ કરી હતી. તેમણે જાહેર સ્થળોએ કચરો ન ફેંકવા અને પોતાની આસપાસનું વાતાવરણ સ્વચ્છ રાખવા અનુરોધ કર્યો હતો.

જિલ્લા કલેક્ટર એન.ડી. પરમારે જણાવ્યું હતું કે, વિશ્વ પ્રવાસન દિન નિમિત્તે અંજનકુંડને સ્વચ્છ અને સુંદર બનાવવાના હેતુથી આ આયોજન કરવામાં આવ્યું છે. અભિયાન દરમિયાન પ્લાસ્ટિકની બોટલો, રેપર્સ અને ખાદ્યપદાર્થોનો કચરો એકત્રિત કરાયો હતો. તેમણે ડાંગની પ્રાકૃતિક સુંદરતા અને પવિત્રતા જાળવવી સૌની સહિયારી જવાબદારી હોવાનું જણાવી પ્રવાસન સ્થળોએ પ્લાસ્ટિક કે ગંદકી ન ફેલાવવા અપીલ કરી હતી.

દક્ષિણ ડાંગના નાયબ વન સંરક્ષક નીરજકુમારે જિલ્લાના તમામ પ્રવાસન સ્થળોને સ્વચ્છ બનાવવા અને પ્રવાસીઓ સુધી સ્વચ્છતાનો સંદેશ પહોંચાડવા ભાર મૂક્યો હતો. અભિયાન માટે બિરસા મુંડા, શહીદ ભગતસિંહ, મંગલ પાંડે, મહાત્મા ગાંધી, નેતાજી સુભાષચંદ્ર બોઝ, રાણી લક્ષ્મીબાઈ, સરદાર વલ્લભભાઈ પટેલ અને ચંદ્રશેખર આઝાદનાં નામે કુલ આઠ ટીમો બનાવવામાં આવી હતી. આ ટીમોએ અંજનકુંડ, નદી અને ધોધ વિસ્તારમાંથી કચરો એકત્રિત કર્યો હતો.

પર્યટન સ્થળોની સ્વચ્છતા જાળવવી વહીવટી તંત્રની સાથે દરેક નાગરિક અને સહેલાણીની પણ નૈતિક જવાબદારી હોવાનું સમજાવવામાં આવ્યું હતું. ‘સ્વચ્છ ડાંગ, પ્રાકૃતિક ડાંગ’ના સંદેશ સાથે પ્રવાસન સ્થળોને સ્વચ્છ અને રમણીય રાખવા સૌને પ્રેરિત કરવામાં આવ્યા હતા.

સમગ્ર આયોજન અને સંકલનની કામગીરી નોડલ અધિકારી તરીકે જિલ્લા ગ્રામ વિકાસ એજન્સીના નિયામક એસ.ડી. તબિયાર તથા નાયબ જિલ્લા વિકાસ અધિકારી હિરલ પટેલે સંભાળી હતી. ટ્રાફિક વ્યવસ્થાપન નાયબ પોલીસ અધિક્ષક દ્વારા કરવામાં આવ્યું હતું. સફાઈનાં સાધનો તથા એકત્રિત ઘન કચરાના યોગ્ય નિકાલ માટે વાહનની વ્યવસ્થા આહવા તાલુકા વિકાસ અધિકારી, લિંગા ગામના સરપંચ અને તલાટી દ્વારા કરવામાં આવી હતી. સ્થળ પર પ્રાથમિક આરોગ્ય સેવાઓ અને શુદ્ધ પીવાના પાણીની વ્યવસ્થા પણ કરાઈ હતી.

અભિયાનમાં જિલ્લા અને તાલુકા પંચાયતના પદાધિકારીઓ, જનપ્રતિનિધિઓ, જિલ્લા પોલીસ વડા પૂજા યાદવ, ઉત્તર ડાંગના નાયબ વન સંરક્ષક મુરારીલાલ મીણા, આહવા પ્રાંત અધિકારી યુ.વી. પટેલ, સુબીર અને વઘઈ તાલુકાના મામલતદારો, લિંગાના રાજવી છત્રસિંહ ભવરસિંહ તથા સ્થાનિક આગેવાનો ઉપસ્થિત રહ્યા હતા. સરકારી વિનયન અને વાણિજ્ય કોલેજ–આહવાના આચાર્ય, અધ્યાપકો, એન.એસ.એસ. અને એન.સી.સી. કેડેટ્સ, વિદ્યાર્થીઓ તથા સફાઈકર્મીઓએ પણ મોટી સંખ્યામાં ભાગ લીધો હતો.