નવસારી જિલ્લાના પ્રવાસન સ્થળો અને યાત્રાધામો ખાતે વિશેષ સફાઈ અભિયાન

‘સ્વચ્છતા હી સેવા–૨૦૨૬’ અંતર્ગત સફાઈ સાથે જનજાગૃતિ; પ્રવાસીઓ અને નાગરિકોને જવાબદાર પ્રવાસન તથા સ્વચ્છતા જાળવવા અપીલ

નવસારી જિલ્લામાં ભારત સરકારના ‘સ્વચ્છતા હી સેવા–૨૦૨૬’ અભિયાન અંતર્ગત અગત્યના પ્રવાસન સ્થળો, યાત્રાધામો તથા આઈકોનિક સ્થળોએ વિશેષ સ્વચ્છતા અભિયાન હાથ ધરવામાં આવ્યું છે. વિવિધ સ્થળોએ સફાઈ કરીને પરિસરને સ્વચ્છ, સુઘડ અને સુંદર બનાવવાની કામગીરી કરવામાં આવી રહી છે.

પ્રવાસન સ્થળોએ આવેલા સામુદાયિક સ્વચ્છતા સંકુલોની સફાઈ સાથે સ્વચ્છતા જાળવણી અંગે જનજાગૃતિ ફેલાવવામાં આવી રહી છે. ભારતીય પુરાતત્વ સર્વેક્ષણ હેઠળનાં સ્થળો અને મુખ્ય ઐતિહાસિક સ્મારકો ખાતે ‘સ્વચ્છતા હી સેવા’ના સંદેશાઓ દ્વારા મુલાકાતીઓને જાગૃત કરવામાં આવી રહ્યા છે.

અભિયાન દરમિયાન પ્રવાસીઓ અને સ્થાનિક નાગરિકોને જાહેર સ્થળોની સ્વચ્છતા જાળવવા તથા કચરો યોગ્ય સ્થળે જ નાખવા પ્રેરિત કરવામાં આવી રહ્યા છે. જવાબદાર પ્રવાસન અને જવાબદાર નાગરિક વર્તન અંગે પણ વ્યાપક પ્રચાર-પ્રસાર કરવામાં આવી રહ્યો છે.

પ્રવાસન સ્થળોની સ્વચ્છતા અને સુંદરતા જાળવવામાં પ્રવાસીઓ તથા સ્થાનિક નાગરિકોની સક્રિય ભાગીદારી વધે તે માટે વિવિધ જાગૃતિલક્ષી પ્રવૃત્તિઓ યોજાઈ રહી છે. જિલ્લાના પ્રવાસન સ્થળો, યાત્રાધામો તથા ઐતિહાસિક અને સાંસ્કૃતિક સ્થળોને સ્વચ્છ રાખવા અને ‘સ્વચ્છ નવસારી, સુંદર નવસારી’નો સંકલ્પ સાકાર કરવા નાગરિકો, પ્રવાસીઓ તથા સંબંધિત સંસ્થાઓને અભિયાનમાં સહભાગી બનવા અપીલ કરવામાં આવી છે.