“ધારાસભ્યની લાલચમાં નવસારીની પ્રજાનો વિકાસ કેમ અટકાવી રહ્યા છો?” — પ્રભાબેન વલસાડીયાનો મેયરને સવાલ

નવસારી મનપાના વોર્ડ નં. ૪નાં કોંગ્રેસ કોર્પોરેટરે ડીમોલેશનની કામગીરી મંદ પડવા અંગે મેયરને પત્ર પાઠવ્યો; પત્ર સોશિયલ મીડિયામાં વાઈરલ થતાં રાજકીય માહોલ ગરમાયો

નવસારી : નવસારી મહાનગરપાલિકાની ચૂંટણીમાં કુલ ૧૩ વોર્ડ પૈકી વોર્ડ નં. ૪માંથી પ્રભાબેન વલસાડીયા અને પ્રકાશભાઈ કાંતિભાઈ હળપતિ કોંગ્રેસ પક્ષમાંથી ચૂંટાઈ આવ્યા હતા. જ્યારે વોર્ડ નં. ૪ના અન્ય બે ઉમેદવારો સહિત તમામ વોર્ડમાંથી ભાજપના ઉમેદવારો ચૂંટાઈ આવ્યા હતા. ત્યારબાદ વોર્ડ નં. ૨ના અશોકભાઈ ધોરાજીયા નવસારી મહાનગરપાલિકાના પ્રથમ મેયર બન્યા હતા.

મહાનગરપાલિકાની રચના બાદ અધિકારીઓ દ્વારા વિવિધ વિસ્તારોમાં ટી.પી. રસ્તાઓ પરનાં દબાણો દૂર કરવા ડીમોલેશનની કામગીરી હાથ ધરવામાં આવી હતી. જોકે, થોડા સમયથી આ કામગીરી મંદ પડી હોવાના મુદ્દે વોર્ડ નં. ૪નાં કોર્પોરેટર પ્રભાબેન વલસાડીયાએ મેયરને પત્ર પાઠવ્યો છે.

પત્રમાં પ્રભાબેને જણાવ્યું હતું કે, શહેરમાં મેયર અશોકભાઈ ધોરાજીયા આગામી ૨૦૨૭ની વિધાનસભાની ચૂંટણીમાં પ્રબળ દાવેદાર હોવાની લોકચર્ચા ચાલી રહી છે. તેમણે આક્ષેપ કર્યો હતો કે આગામી ચૂંટણીમાં વોટબેંક જાળવવા માટે ડીમોલેશનની કામગીરી ધીમી પાડીને શહેરનો વિકાસ અવરોધવામાં આવી રહ્યો હોય એવું લાગી રહ્યું છે.

તેમણે પત્રમાં જણાવ્યું હતું કે, “તમને તમારી પાર્ટી ધારાસભ્યની ટિકિટ આપે અને તમે ચૂંટણી લડો, તેમાં અમને કોઈ વાંધો નથી. પરંતુ ધારાસભ્યની લાલચમાં નવસારીની પ્રજાનો વિકાસ તમે કેમ અટકાવી રહ્યા છો?”

વધુમાં તેમણે જણાવ્યું હતું કે શહેરની પ્રજાએ મેયરને પ્રથમ નાગરિક તરીકે સ્થાન આપ્યું છે અને તેમના પર પૂરો ભરોસો રાખ્યો છે. તેથી પ્રજાનાં અધૂરાં કામો ઝડપથી પૂર્ણ કરવામાં આવે અને તેમાં કોઈ રાજકારણ ન હોવું જોઈએ.

આ પત્ર સોશિયલ મીડિયામાં વાઈરલ થતાં નવસારીનો રાજકીય માહોલ ગરમાયો હતો.