વાંસદાના અંકલાછ ગામે ખેરનાં ત્રણ વૃક્ષો કાપી ગેરકાયદે વેચ્યાનો આક્ષેપ

સંયુક્ત માલિકીની અને સરકારી શીરપડતર જમીનમાંથી વૃક્ષો કાપવા અંગે મામલતદાર તથા વન વિભાગને લેખિત ફરિયાદ; જવાબદારો સામે કાર્યવાહી અને વળતરની માંગ

વાંસદા : વાંસદા તાલુકાના અંકલાછ ગામે સંયુક્ત માલિકીની જમીન તથા નજીક આવેલી સરકારી શીરપડતર જમીનમાંથી પાસ-પરમિટ વિના ખેરનાં ત્રણ વૃક્ષો કાપી તેમનાં લાકડાં ચોરીને વેચી નાખ્યાનો આક્ષેપ કરવામાં આવ્યો છે. આ મામલે અંકલાછના રહેવાસી ભાવેશભાઈ ચીમનભાઈ પાડવીએ વાંસદા મામલતદાર તથા રેન્જ ફોરેસ્ટ ઓફિસરને લેખિત ફરિયાદ કરી જવાબદારો સામે ગુનો નોંધવા અને કડક કાર્યવાહી કરવાની માંગ કરી છે.

ફરિયાદ મુજબ, અંકલાછ ગામે ખાતા નં. ૨૫ હેઠળ બ્લોક સર્વે નં. ૭૦૧ની સંયુક્ત માલિકીની જમીન આવેલી છે. તેની બાજુમાં બ્લોક નં. ૭૧૫ની સરકારી શીરપડતર જમીન આવેલી છે. તા. ૨૪ સપ્ટેમ્બરે બંને જમીનમાંથી કુલ ત્રણ ખેરનાં વૃક્ષો કાપવામાં આવ્યાં હોવાનો આક્ષેપ છે. તેમાં બે વૃક્ષો સંયુક્ત માલિકીની જમીનમાંથી અને એક વૃક્ષ શીરપડતર જમીનમાંથી કાપવામાં આવ્યું હોવાનું ફરિયાદમાં જણાવાયું છે.

ફરિયાદમાં જપેશભાઈ માલજીભાઈ દેશમુખના કહેવાથી પ્રકાશભાઈ મગનભાઈ ચૌધરી, અરવિંદભાઈ જગુભાઈ ખોટરીયા તથા જયુનાભાઈ બળવંતભાઈ પવાર દ્વારા વૃક્ષો કાપવામાં આવ્યાં હોવાનો આક્ષેપ કરાયો છે. મોટા કદનાં ખેરનાં લાકડાં વેચી નાખવામાં આવ્યાં હોવાનું અને ઘટનાસ્થળે હાલ માત્ર જલાઉ લાકડું પડેલું હોવાનું પણ ફરિયાદમાં જણાવાયું છે.

આ મામલે ગામમાં પંચ બેસાડવામાં આવ્યું હતું. જોકે, ફરિયાદીના જણાવ્યા મુજબ, જપેશભાઈ દેશમુખ સિવાય અન્ય તમામ લોકો હાજર રહ્યા હતા. તેમની ગેરહાજરીને કારણે પંચમાં કોઈ નિર્ણય થઈ શક્યો ન હોવાનું ફરિયાદીએ જણાવ્યું છે.

ફરિયાદીએ સ્થળ તપાસ કરીને વૃક્ષો કાપવાની હકીકત ચકાસવા, જવાબદારો સામે વન કાયદા તથા અન્ય લાગુ પડતી જોગવાઈઓ હેઠળ કાયદેસરની કાર્યવાહી કરવા અને થયેલા નુકસાનનું વળતર અપાવવાની માંગ કરી છે.