નવસારીમાં કોંગ્રેસે મુખ્ય ચૂંટણી કમિશનરના રાજીનામાની માંગ સાથે વિરોધ પ્રદર્શન કર્યું

કલેક્ટર કચેરી નજીક જ્ઞાનેશકુમારના ફોટાનું દહન; ચક્કાજામ કરતાં કોંગ્રેસના આગેવાનો અને કાર્યકરોને પોલીસે ડિટેઇન કર્યા

નવસારી : મુખ્ય ચૂંટણી કમિશનર જ્ઞાનેશકુમારના રાજીનામાની માંગ સાથે નવસારી શહેર જિલ્લા કોંગ્રેસ સમિતિ, મહિલા કોંગ્રેસ અને યુથ કોંગ્રેસ દ્વારા નવસારી કલેક્ટર કચેરી નજીક વિરોધ પ્રદર્શન કરવામાં આવ્યું હતું.

વિરોધ દરમિયાન કોંગ્રેસના આગેવાનો અને કાર્યકરોએ જ્ઞાનેશકુમાર વિરુદ્ધ દેખાવો કરી તેમના રાજીનામાની માંગ કરી હતી. સાથે જ તેમના કાર્યકાળ દરમિયાન યોજાયેલી તમામ ચૂંટણીઓની સમીક્ષા કરવા તથા બંગાળ અને બિહારમાં ફરીથી ચૂંટણી યોજવાની માંગ કરવામાં આવી હતી.

પ્રદર્શન દરમિયાન કાર્યકરોએ જ્ઞાનેશકુમારના ફોટાનું દહન કર્યું હતું. ત્યારબાદ ચક્કાજામ કરતાં સ્થાનિક પોલીસે કોંગ્રેસના આગેવાનો તથા કાર્યકરોને ડિટેઇન કર્યા હતા.

કાર્યક્રમમાં નવસારી જિલ્લા કોંગ્રેસ પ્રમુખ શૈલેષ પટેલ, શહેર કોંગ્રેસ પ્રમુખ દીપક બારોટ, કાર્યકારી પ્રમુખ રાજન જોશી, મહિલા કોંગ્રેસ પ્રમુખ સમીરા શેખ, કોર્પોરેટર પ્રભાબેન વલસાડીયા, યુથ કોંગ્રેસ પ્રમુખ આદિલ શાહ, મનીષ બારોટ તથા વરિષ્ઠ આગેવાનો એ.ડી. પટેલ અને વિરેન્દ્રભાઈ દેસાઈ સહિત મોટી સંખ્યામાં કાર્યકરો અને આગેવાનો ઉપસ્થિત રહ્યા હતા.