નવસારીના લક્ષ્મણ હોલના પટાંગણમાં કચરાનો ઢગલો; સ્વચ્છતા અભિયાનની કામગીરી સામે સવાલ

ગણેશ વિસર્જન દરમિયાન જ્યાં શાસકો અને અધિકારીઓએ ગણેશ મંડળોનું સ્વાગત કર્યું હતું ત્યાં ગંદકી; સફાઈ માત્ર ફોટા પડાવવા પૂરતી હોવાની શહેરીજનોમાં ચર્ચા

નવસારી : વડાપ્રધાન નરેન્દ્રભાઈ મોદીના જાહેરજીવનમાં સેવા, સમર્પણ અને સુશાસનના ૨૫ વર્ષ પૂર્ણ થવાના અવસરે સમગ્ર દેશમાં સેવા સંકલ્પ અભિયાન ચલાવવામાં આવી રહ્યું છે. આ અભિયાન અંતર્ગત નવસારી સહિત વિવિધ જિલ્લાઓમાં સ્વચ્છતા કાર્યક્રમો યોજાઈ રહ્યા છે. સરકારી કર્મચારીઓ, ઉચ્ચ અધિકારીઓ, કાર્યકર્તાઓ, નેતાઓ અને મંત્રીઓ સફાઈની કામગીરીમાં ભાગ લઈ રહ્યા છે.

આ દરમિયાન નવસારીના ટાવર રોડ પર આવેલા લક્ષ્મણ હોલના પટાંગણમાં કચરાનો ઢગલો જોવા મળતાં સ્થાનિક સ્તરે સ્વચ્છતાની કામગીરી સામે સવાલ ઊઠ્યા છે.

થોડા દિવસો અગાઉ ગણેશ વિસર્જન દરમિયાન આ જ પટાંગણમાં મંડપ ઊભો કરીને શાસકો અને અધિકારીઓએ ગણેશ મંડળોનું સ્વાગત કર્યું હતું. કાર્યક્રમ બાદ એ જ સ્થળે કચરો જોવા મળતાં મહાનગરપાલિકા અને જિલ્લા તંત્રની સફાઈ વ્યવસ્થા અંગે નારાજગી વ્યક્ત થઈ રહી છે.

સ્વચ્છતા અભિયાનના કાર્યક્રમો વચ્ચે જાહેર સ્થળે ગંદકી જોવા મળતાં અધિકારીઓ અને નેતાઓની સફાઈની કામગીરી માત્ર ફોટા પડાવવા પૂરતી મર્યાદિત છે કે કેમ તેવી ચર્ચા શહેરીજનોમાં ચાલી રહી છે.