નવસારીમાં ગ્લો ગાર્ડન અને મ્યુઝિકલ ફાઉન્ટન જોવા પ્રવેશ ફી વસૂલવાની તૈયારી

૩૦મી સપ્ટેમ્બરની સામાન્ય સભામાં ટિકિટના દર નક્કી કરવાનો મુદ્દો રજૂ થશે; જાહેર નાણાંથી વિકસાવેલી સુવિધાઓ માટે ફી વસૂલવાના પ્રસ્તાવથી શહેરીજનોમાં નારાજગી

નવસારી : નવસારી મહાનગરપાલિકા સંચાલિત ગ્લો ગાર્ડન અને મ્યુઝિકલ ફાઉન્ટન જોવા માટે જાહેર જનતા પાસેથી પ્રવેશ ફી વસૂલવાનો મુદ્દો આજે ૩૦મી સપ્ટેમ્બરે યોજાનારી સામાન્ય સભામાં મૂકવામાં આવ્યો છે. આ બંને સ્થળો માટે ટિકિટના દર નક્કી કરવાની તૈયારીને પગલે શહેરીજનો પર વધુ આર્થિક બોજ પડવા અંગે નારાજગી વ્યક્ત થઈ રહી છે.

શહેરના ચાંદની ચોક ખાતે આવેલો અજગરવાળો બગીચો નાના બાળકોના રમવા માટે જાણીતો હતો. મહાનગરપાલિકાએ કરોડો રૂપિયાના ખર્ચે આ બગીચાને ગ્લો ગાર્ડન તરીકે વિકસાવ્યો છે. તેમાં લાઇટવાળાં કાર્ટુન પાત્રો તથા વિવિધ પ્રાણીઓનાં પૂતળાં મૂકવામાં આવ્યાં છે. હાલ આ ગાર્ડન શહેરીજનો માટે ખુલ્લો છે અને સાંજથી રાત્રિ દરમિયાન લોકો પોતાનાં બાળકોને અહીં ફરવા લઈ આવે છે.

બીજી તરફ, ટાટા હોલ પાસે આવેલા તળાવમાં કરોડો રૂપિયાના ખર્ચે મ્યુઝિકલ ફાઉન્ટન બનાવવામાં આવ્યું છે. અહીં સંગીતના તાલે પાણીના ફુવારાનો શો બતાવવાની વ્યવસ્થા કરવામાં આવી હતી. અગાઉ આ તળાવનો વિસ્તાર શહેરીજનોને ચાલવા, ફરવા અને બેસવા માટે ખુલ્લો હતો. મ્યુઝિકલ ફાઉન્ટન બનાવ્યા બાદ તળાવની આસપાસ બહારથી ન દેખાય તેવી આડશ ઊભી કરવામાં આવી હતી. શરૂઆતમાં શો યોજાયા હતા, પરંતુ છેલ્લા ઘણા સમયથી શો બંધ હોવાનું જણાવાયું છે.

મહાનગરપાલિકામાં કોર્પોરેટરો ચૂંટાઈ આવ્યા બાદ શહેરનાં વિકાસકામોની ચર્ચા અને મંજૂરી માટે યોજાનારી સામાન્ય સભામાં ગ્લો ગાર્ડન તથા મ્યુઝિકલ ફાઉન્ટનની પ્રવેશ ટિકિટના દર નક્કી કરવાનો મુદ્દો પણ સામેલ કરવામાં આવ્યો છે.

જાહેર નાણાંમાંથી કરોડો રૂપિયાના ખર્ચે વિકસાવાયેલી આ સુવિધાઓનો ઉપયોગ કરવા માટે હવે નાગરિકોએ ફી ચૂકવવી પડે તે અંગે સવાલ ઊઠ્યા છે. અજગરવાળા બગીચામાં બાળકો માટે નવા અને સારા રમતગમતનાં સાધનો મૂકવાને બદલે તેને મુખ્યત્વે જોવાલાયક ગ્લો ગાર્ડનમાં ફેરવવામાં આવ્યો હોવા અંગે પણ નારાજગી વ્યક્ત થઈ રહી છે.

શહેરીજનોના મનોરંજન માટે બનાવવામાં આવેલા મ્યુઝિકલ ફાઉન્ટનનો શો જોવા પણ પૈસા ચૂકવવા પડે તે મુદ્દે ચર્ચા ચાલી રહી છે. સામાન્ય સભામાં મેયર, ચેરમેનો અને કોર્પોરેટરો પ્રવેશ ફી તથા ટિકિટના દર અંગે શું નિર્ણય લે છે તે જોવું રહ્યું.