ગાંધી ફાટકથી એરૂ રોડ પર પૂરઝડપે આવેલી કારની ટક્કરે 55 વર્ષના લારીચાલકનું મોત

પુત્રની ફરિયાદના આધારે જલાલપોર પોલીસે કારચાલકને ઝડપ્યો; ચાલક નશામાં હોવાનો સ્થાનિકોનો આક્ષેપ, વિસ્તારમાં પેટ્રોલિંગ અને સ્ટ્રીટ લાઇટની માંગ

નવસારી : ગાંધી ફાટકથી એરૂ ચાર રસ્તા તરફના માર્ગ પર પૂરઝડપે આવેલી કારની ટક્કરે 55 વર્ષના લારીચાલક અરૂણભાઈ દેવશંકર ઉપાધ્યાયનું ઘટનાસ્થળે જ મોત નીપજ્યું હતું. અકસ્માત બાદ કારચાલક અને તેનો મિત્ર કાર મૂકીને નાસી ગયા હતા. જલાલપોર પોલીસે મૃતકના પુત્રની ફરિયાદના આધારે કારચાલક વિરુદ્ધ ગુનો નોંધી તેને ઝડપી પાડી આગળની કાર્યવાહી હાથ ધરી છે.

મૂળ ઉત્તર પ્રદેશના જોનપુર જિલ્લાના બદલાપુર તાલુકાના ભગવાનપુર ગામના અને હાલ જલાલપોરના એરૂ ચાર રસ્તા નજીક સીતારામનગર સોસાયટીમાં રહેતા અરૂણભાઈ તેમના પુત્ર અંકિત સાથે ફળ અને શાકભાજીના જ્યૂસની લારી ચલાવી પરિવારનું ગુજરાન ચલાવતા હતા.

ગત 27મીએ અરૂણભાઈ અને તેમના પુત્રએ સામાન ગોઠવી લારી બંધ કરી હતી. ત્યારબાદ અરૂણભાઈ અબ્રામા રોડ પાર કરીને શૌચ માટે ગયા હતા. તેઓ પરત લારી પાસે આવી રહ્યા હતા ત્યારે ગાંધી ફાટકથી એરૂ ચાર રસ્તા તરફ જતી સફેદ રંગની ઓડી ક્યુ-3 2.0 કાર (નં. જીજે-21-એએચ-9347)એ તેમને ટક્કર મારી હતી.

ફરિયાદ મુજબ, જલાલપોરની ઇન્ડિયા કોલોનીમાં રહેતા કારચાલક શિવાંગ ભરતભાઈ પટેલે પૂરઝડપે અને ગફલતભરી રીતે કાર હંકારી અકસ્માત સર્જ્યો હતો. ટક્કરથી અરૂણભાઈ આશરે 10થી 15 ફૂટ દૂર ફંગોળાયા હતા. શરીર અને માથાના ભાગે ગંભીર ઈજાઓ થતાં તેમનું ઘટનાસ્થળે જ મોત નીપજ્યું હતું.

અકસ્માત બાદ શિવાંગ અને તેનો મિત્ર વીકી કાર ઘટનાસ્થળે મૂકીને નાસી ગયા હતા. જાણ થતાં જલાલપોર પોલીસ તાત્કાલિક સ્થળ પર પહોંચી હતી. મૃતકના પુત્ર અંકિતની ફરિયાદના આધારે ગુનો નોંધી પી.એસ.આઈ. ડી.એન. ચૌધરીએ વધુ તપાસ હાથ ધરી છે.

સ્થાનિકોના આક્ષેપ મુજબ, શિવાંગ રાત્રિ દરમિયાન નશાની હાલતમાં લોકો સાથે ઝઘડો કરતો અને વાહનચાલકો તથા રાહદારીઓથી વ્યસ્ત રસ્તાઓ પર પૂરઝડપે કાર ચલાવતો હતો. લોકો સામે રોફ જમાવતો હોવાના પણ આક્ષેપો કરવામાં આવ્યા છે. જીવલેણ અકસ્માતને પગલે ઘટનાસ્થળે એકત્ર થયેલા લોકોમાં ભારે રોષ જોવા મળ્યો હતો.

આરોપી દારૂ ઉપરાંત અન્ય નશાકારક પદાર્થોનું સેવન કરતો હોવાની સ્થાનિકોમાં ચર્ચા છે. આ બાબતે જરૂરી તબીબી પરીક્ષણો દ્વારા તપાસ કરવાની માંગ ઊઠી છે. જોકે રજૂ થયેલી વિગતોમાં નશાની પુષ્ટિ કરતો કોઈ તબીબી અહેવાલ ઉપલબ્ધ નથી.

દાંતેજ ચોકડીથી એરૂ ચાર રસ્તા સુધીના માર્ગ પર દિવસ-રાત મોટી સંખ્યામાં વાહનોની અવરજવર રહે છે. સ્થાનિકોના જણાવ્યા મુજબ, રાત્રે કેટલાક વાહનચાલકો ફેન્સી નંબર પ્લેટવાળાં, નંબર પ્લેટ વિનાનાં તથા કાળી ફિલ્મ લગાવેલાં વાહનો લઈને નીકળે છે. વધુ અવાજ કરતા સાઇલેન્સર અને પૂરઝડપે દોડતાં વાહનોને કારણે રહેવાસીઓ પરેશાન થાય છે. નાના અકસ્માતોમાં ફરિયાદ થતી ન હોવાથી તેની પોલીસ ચોપડે નોંધ થતી નથી તેમ પણ સ્થાનિકોનું કહેવું છે. આ માર્ગ પર નિયમિત પેટ્રોલિંગ અને વાહન ચેકિંગની માંગ કરવામાં આવી છે.

સ્થાનિકોએ સ્ટ્રીટ લાઇટની અપૂરતી વ્યવસ્થા અંગે પણ પ્રશ્નો ઉઠાવ્યા છે. તેમના જણાવ્યા મુજબ, દાંતેજથી એરૂ ચાર રસ્તા સુધીનો માર્ગ પહોળો કરવામાં આવ્યો છે, પરંતુ કેટલાક ભાગોમાં સ્ટ્રીટ લાઇટનો અભાવ છે અને જ્યાં લાઇટો છે ત્યાં પણ તે ઘણીવાર બંધ રહે છે. રાત્રે રાહદારીઓને રસ્તો પાર કરવામાં મુશ્કેલી પડતી હોવાથી નવસારી મહાનગરપાલિકા નવી સ્ટ્રીટ લાઇટો લગાવે અને બંધ લાઇટો ચાલુ કરાવે તેવી માંગ છે.

દાંતેજ ચોકડી, છાપરા ચોકડી તથા હાંસાપોર-એરૂ વિસ્તારમાં આવેલી કેટલીક ખાણીપીણીની દુકાનો અને ગલ્લાઓ મોડી રાત સુધી ખુલ્લાં રહેતાં હોવાની પણ સ્થાનિકોએ ફરિયાદ કરી છે. કેટલીક જગ્યાએ યુવાનો નશાકારક પદાર્થોનું સેવન કરતા હોવાના આક્ષેપો સાથે, નશો કરીને વાહન ચલાવનારાઓ તથા આવી પ્રવૃત્તિઓ માટે જગ્યા આપનારાઓ સામે તપાસ કરીને કાર્યવાહી કરવાની માંગ કરવામાં આવી છે.