વાંસદામાં ખેરનાં 6 વૃક્ષો કાપી લાકડું સગેવગે કરવાની તૈયારીમાં 7 ઝડપાયા

વન વિભાગે રાણી ફળિયા વિસ્તારમાંથી 2.026 ઘનમીટર ખેરનું લાકડું, ટેમ્પો અને 3 બાઇક જપ્ત કરી

વાંસદા : વાંસદામાં વણારસી જતા મુખ્ય માર્ગ નજીક ખેરનાં 6 વૃક્ષો કાપી લાકડું સગેવગે કરવાની તૈયારીમાં રહેલા 7 શખ્સોને વન વિભાગની ટીમે ઝડપી પાડ્યા હતા. સ્થળ પરથી ખેરનું લાકડું, એક ટેમ્પો અને 3 બાઇક જપ્ત કરીને આગળની કાર્યવાહી હાથ ધરવામાં આવી છે.

વાંસદા પશ્ચિમ રેન્જના જામલિયા બીટના રાણી ફળિયા (ગડગાબારી) વિસ્તારમાં મોડી રાત્રે અંધારાનો લાભ લઈને ખેરનાં વૃક્ષો કાપી લાકડું લઈ જવાની તૈયારી કરવામાં આવી રહી હતી. તે દરમિયાન વલસાડ નાયબ વન સંરક્ષક અને વાંસદા સહાયક વન સંરક્ષકના માર્ગદર્શન હેઠળ પેટ્રોલિંગ કરી રહેલી વન વિભાગની ટીમે સ્થળ પર કાર્યવાહી કરી હતી.

ટીમે સ્થળ પરથી શશીકાંત પટેલ (લીમઝર), કિરણ પટેલ, અવિનાશ દીપક પટેલ, અજય ગરાસિયા, નીતિન ગરાસિયા, રોહિતભાઈ જાદવ તેમજ સંજય ગમનભાઈ ગરાસિયાને ઝડપી પાડ્યા હતા.

વન વિભાગે તેમની પાસેથી 2.026 ઘનમીટર ખેરનું લાકડું, ટેમ્પો (નં. જીજે-15-એક્સ-8668) તથા 3 બાઇક સહિતનો મુદ્દામાલ જપ્ત કર્યો હતો. તમામ આરોપીઓ વિરુદ્ધ ગુનો નોંધી આગળની કાયદેસરની કાર્યવાહી હાથ ધરવામાં આવી છે.