ગણદેવીના ઘોલાઇ બંદરે સરકારી જમીન પરથી ગેરકાયદેસર દબાણો દૂર કરાયાં

દરિયાઈ સુરક્ષાને ધ્યાનમાં રાખીને 18 જેટલી દુકાનો, શેડ અને અન્ય દબાણો હટાવાયાં; અંદાજે 2 હજાર ચો.મી. સરકારી જમીન ખુલ્લી કરાઈ

નવસારી : ગણદેવી તાલુકાના ઘોલાઇ બંદર ખાતે સરકારી જમીન પર દુકાનો, બાંધકામો અને શેડ સ્વરૂપે થયેલાં ગેરકાયદેસર દબાણો અંગે ફરિયાદો મળતાં તંત્રએ દરિયાઈ સુરક્ષાને ધ્યાનમાં રાખીને ગત 24મી સપ્ટેમ્બરથી દબાણ દૂર કરવાની કામગીરી શરૂ કરી હતી. જોકે દબાણ કરનારાઓએ પોતાનો સામાન અન્ય સ્થળે ખસેડવા સમય માંગતાં તેમને 27મી સપ્ટેમ્બર સુધીની મુદત આપવામાં આવી હતી.

નવસારી જિલ્લા કલેક્ટર મનીષ ગુરવાનીના માર્ગદર્શન અને દેખરેખ હેઠળ ઘોલાઇ બંદર ખાતે દબાણો દૂર કરવાની કાર્યવાહી હાથ ધરવામાં આવી હતી. આ કામગીરીમાં ચીખલી પ્રાંત અધિકારી નિશાંત કુગસીયા, ગણદેવી મામલતદાર દિપીકા શેઝ, બીલીમોરા સર્કલ ઓફિસર વનરાજસિંહ સોલંકી, ગણદેવી સર્કલ ઓફિસર જીગરભાઈ જોષી, બીગરી મહેસૂલી તલાટી અરવિંદભાઈ રબારી, ધોલાઈ ગ્રામપંચાયતના તલાટી પ્રદિપ પટેલ, વલસાડ રૂરલ ડિવિઝનના નાયબ ઇજનેર, જી.ઇ.બી.ના કર્મચારીઓ તથા પોલીસ સ્ટાફ હાજર રહ્યા હતા.

કાર્યવાહી દરમિયાન 18 જેટલી નાની-મોટી અનધિકૃત દુકાનો, પતરાના શેડ, ગેરેજ, કેબિન તથા અન્ય ગેરકાયદેસર દબાણો દૂર કરવામાં આવ્યાં હતાં. આ કામગીરીથી અંદાજે કુલ 2 હજાર ચોરસ મીટર જેટલી સરકારી જમીન ખુલ્લી કરવામાં આવી હતી.

સમગ્ર ડિમોલિશન દરમિયાન કાયદો અને વ્યવસ્થાની સ્થિતિ જળવાઈ રહે તથા કોઈ અનિચ્છનીય ઘટના ન બને તે માટે સ્થાનિક પોલીસે પૂરતો બંદોબસ્ત ગોઠવ્યો હતો.

સરકારી મિલકતનું રક્ષણ કરવા તથા સરકારી જમીન અને પર્યાવરણને નુકસાન પહોંચાડતી ગેરકાયદેસર પ્રવૃત્તિઓને રોકવા જિલ્લા તંત્રએ કડક અભિગમ અપનાવ્યો છે. આવી પ્રવૃત્તિઓ ચલાવી લેવામાં આવશે નહીં તેમ તંત્રએ જણાવ્યું છે.