ગણદેવીના ભાટ ગામે સરકારી જમીનની માપણી અને ગેરકાયદેસર અતિક્રમણો દૂર કરવા માંગ

ઝીંગા ઉછેરના તળાવો અને અન્ય બાંધકામોથી વરસાદી તથા કુદરતી પાણીના નિકાલમાં અવરોધ સર્જાતો હોવાના આક્ષેપ

નવસારી : ગણદેવી તાલુકાના ભાટ ગામે ઝીંગા ઉછેરના તળાવો તથા અન્ય બાંધકામોના કારણે વરસાદી પાણી અને કુદરતી રેલના નિકાલમાં અવરોધ સર્જાતો હોવાના આક્ષેપ સાથે શ્રી માછી સમાજ સુધારક પંચે જિલ્લા કલેક્ટરને આવેદનપત્ર પાઠવી સરકારી જમીનની માપણી અને ગેરકાયદેસર અતિક્રમણો દૂર કરવાની માંગ કરી છે.

આવેદનપત્રમાં જણાવ્યા મુજબ ભાટ ગામ દરિયાકાંઠાનું ગામ છે અને ગામના મોટાભાગના લોકો માછીમારીના વ્યવસાય સાથે સંકળાયેલા છે. ગામની ભૌગોલિક સ્થિતિ અને દરિયાઈ ખાડી સાથેના સીધા સંબંધને કારણે વરસાદી પાણી તથા કુદરતી રેલના પાણીના અવરોધરહિત નિકાલ માટે કુદરતી પાણીના માર્ગો અને ખાડીનું અસ્તિત્વ મહત્વપૂર્ણ હોવાનું જણાવાયું છે.

ભાટ ગામના વાડા ફળિયાની પૂર્વ દિશામાં ફિશરીઝ રોડની બાજુમાં વાસુભાઈ બાબુભાઈ ટંડેલ તથા અન્ય વ્યક્તિઓ દ્વારા વ્યક્તિગત ઝીંગા ઉછેરના તળાવો બનાવવામાં આવ્યા હોવાનો આવેદનમાં આક્ષેપ કરાયો છે. આશરે વર્ષ 1993 દરમિયાન જીએફસીસીએ નામની સહકારી સંસ્થાને સરકાર દ્વારા ખાર-ખાંજણવાળી જમીનમાં ઝીંગા ઉછેર માટે આશરે 46 હેક્ટર જમીનનો કબજો અથવા ફાળવણી કરવામાં આવી હોવાનું પણ જણાવાયું છે.

આ જમીન લાંબા સમય સુધી બિનઉપયોગી રહેતાં તેના કેટલાક ભાગ પર અન્ય વ્યક્તિઓ દ્વારા કબજો કરવામાં આવ્યો હોવાના આક્ષેપ કરવામાં આવ્યા છે. ઉપરાંત સરકારી માપણી કર્યા વિના અને કુદરતી પાણીના પ્રવાહને ધ્યાનમાં લીધા વિના ઝીંગા ઉછેરના તળાવો તથા પાળા બનાવવામાં આવ્યા હોવાનો પણ આક્ષેપ કરાયો છે.

આવેદનમાં જણાવાયું છે કે આવા પાળા અને બાંધકામોના કારણે વરસાદી તથા કુદરતી રેલના પાણીના નિકાલમાં અવરોધ સર્જાયો હતો, જેના કારણે ભાટ ગામના વિવિધ ફળિયાઓના રહેણાંક વિસ્તારોમાં પાણી ભરાયું હતું. પરિણામે કેટલાક પરિવારોની ઘરવખરી, અનાજ, ઘરવપરાશની વસ્તુઓ અને અન્ય સામાનને નુકસાન થતાં ગ્રામજનોને આર્થિક નુકસાન અને મુશ્કેલીનો સામનો કરવો પડ્યો હતો.

ગામજનોની રજૂઆત અને વિરોધ બાદ કેટલાક પાળા તોડી પાણીનો નિકાલ કરવામાં આવ્યો હોવાનું પણ આવેદનમાં જણાવાયું છે. શ્રી માછી સમાજ સુધારક પંચે કુદરતી પાણીના પ્રવાહને અવરોધતા તમામ પાળા, બાંધકામો તથા અતિક્રમણોની તાત્કાલિક અને નિષ્પક્ષ સ્થળ તપાસ કરવાની માંગ કરી છે.

સાથે જ સરકારી જમીન, જાહેર માર્ગ, ખાડી, કુદરતી પાણીના પ્રવાહ અથવા અન્ય જાહેર ઉપયોગની જમીન ઉપર ગેરકાયદેસર બાંધકામ કે અતિક્રમણ થયેલું જણાય તો નિયમોનુસાર તેને દૂર કરવાની માંગ કરવામાં આવી છે.