નવસારી મનપા કમિશનરે વિકાસકાર્યો અને ‘એક દીવો આશીર્વાદનો’ કાર્યક્રમની તૈયારીઓની સ્થળ મુલાકાત લીધી

જૂનાથાણા સર્કલ ડેવલપમેન્ટ, વિરાવળ તળાવ અને નમો મિત્ર પાર્ક અંતર્ગત કાંકરિયા લેક કામગીરીની સમીક્ષા કરી જરૂરી સૂચનાઓ આપી

નવસારી : નવસારી મહાનગરપાલિકાના કમિશનર જયેશ ઉપાધ્યાય દ્વારા રૂટિન ફિલ્ડ વિઝીટ હાથ ધરવામાં આવી હતી. જેમાં જૂનાથાણા વિસ્તારમાં સર્કલ ડેવલપમેન્ટ, વિરાવળ તળાવ ખાતે દબાણો દૂર કરવા તથા તિઘરા વિસ્તારમાં નમો મિત્ર પાર્ક અંતર્ગત કાંકરિયા લેક ડેવલપમેન્ટની કામગીરી અંગે સમીક્ષા કરવામાં આવી હતી.

નવસારીના લુન્સીકુંઈ ગ્રાઉન્ડ ખાતે યોજાનાર ‘એક દીવો આશીર્વાદનો’ જનકલ્યાણલક્ષી કાર્યક્રમની પૂર્વ તૈયારીના ભાગરૂપે મ્યુનિસિપલ કમિશનર જયેશ ઉપાધ્યાય અને નાયબ મ્યુનિસિપલ કમિશનર ગૌરાંગ વસાણી સહિત વહીવટી તંત્રના ઉચ્ચ અધિકારીઓ અને ઇજનેરોએ સ્થળ મુલાકાત લીધી હતી. કાર્યક્રમને સુવ્યવસ્થિત અને સફળતાપૂર્વક સંપન્ન કરવા તેમજ નાગરિકોને કોઈ અગવડ ન પડે તે માટે તમામ જરૂરી વ્યવસ્થાઓ સમયસર પૂર્ણ કરવા સંબંધિત અધિકારીઓને સૂચનાઓ આપવામાં આવી હતી.

ત્યારબાદ જૂનાથાણા વિસ્તારમાં સર્કલ ડેવલપમેન્ટની કામગીરીની પ્રગતિ અને આયોજનની સમીક્ષા કરવામાં આવી હતી. ટ્રાફિક વ્યવસ્થા અને વિસ્તારના સુશોભનને ધ્યાનમાં રાખીને ‘વિકસિત ભારત મિશન 2047’ને અનુરૂપ સર્કલ ડેવલપમેન્ટ કરવા ઇજનેરોને જરૂરી માર્ગદર્શન આપવામાં આવ્યું હતું.

વિરાવળ તળાવ ખાતે તળાવની આસપાસના દબાણો નિયમોનુસાર અને ટીપીના નિયમો મુજબ દૂર કરવા તેમજ તળાવ ડેવલપમેન્ટની કામગીરી વહેલી તકે શરૂ કરવા જરૂરી પ્રક્રિયા ઝડપી બનાવવા સૂચના આપવામાં આવી હતી.

રૂટિન વિઝીટના અંતિમ તબક્કામાં તિઘરા વિસ્તારમાં નમો મિત્ર પાર્ક અંતર્ગત કાંકરિયા લેક ડેવલપમેન્ટ પ્રોજેક્ટની સમીક્ષા કરવામાં આવી હતી. સંયુક્ત બે તળાવોને ભવિષ્યમાં આકર્ષક પ્રવાસન સ્થળ તરીકે વિકસાવવા માટે લેન્ડસ્કેપિંગ, જાહેર સુવિધાઓ અને સમગ્ર વિસ્તારના સુઆયોજિત વિકાસ અંગે ચર્ચા કરવામાં આવી હતી.

કમિશનર જયેશ ઉપાધ્યાયે કન્સલ્ટન્ટ અને ઇજનેરો સાથે પ્રોજેક્ટની ડિઝાઇન અને આયોજનના વિવિધ પાસાઓની સમીક્ષા કરી વિસ્તારની વિશિષ્ટતા જળવાઈ રહે તથા નાગરિકો અને મુલાકાતીઓ માટે આકર્ષણનું કેન્દ્ર બને તે દિશામાં કામગીરી કરવા સૂચનાઓ આપી હતી.

નવસારી શહેરના ભવિષ્યલક્ષી અને પ્રવાસન વિકાસને ધ્યાનમાં રાખીને તિઘરા વિસ્તારને સુઆયોજિત રીતે વિકસાવી શહેરને આગવું નજરાણું મળે તેમજ પ્રવાસન સુવિધાઓમાં વધારો થાય તે માટે જરૂરી દિશા-નિર્દેશ આપવામાં આવ્યા હતા. સમગ્ર સ્થળ મુલાકાત દરમિયાન નાયબ મ્યુનિસિપલ કમિશનર ગૌરાંગ વસાણી, ઇજનેરો, કન્સલ્ટન્ટ અને મહાનગરપાલિકાના વિવિધ વિભાગોના અધિકારીઓ ઉપસ્થિત રહ્યા હતા. તમામ કામગીરીમાં ગુણવત્તા, સમયબદ્ધતા અને યોગ્ય આયોજનને પ્રાથમિકતા આપવા સૂચના આપવામાં આવી હતી.