વડાપ્રધાનના જન્મદિવસે નવસારીમાં કોંગ્રેસનો ‘ચીની પે ચર્ચા’ કાર્યક્રમ, મોંઘવારીનો વિરોધ

નવસારી મનપા કચેરી બહાર ₹40 પ્રતિ કિલોના ભાવે ખાંડનું વિતરણ, ખરીદી માટે લોકોની લાંબી કતારો લાગી

નવસારી : વડાપ્રધાન નરેન્દ્ર મોદીના જન્મદિવસ નિમિત્તે નવસારી શહેર કોંગ્રેસ દ્વારા વધતી મોંઘવારીના વિરોધમાં ‘ચીની પે ચર્ચા’ કાર્યક્રમ યોજવામાં આવ્યો હતો. કાર્યક્રમ દરમિયાન કોંગ્રેસના કાર્યકરોએ નવસારી મહાનગરપાલિકાના પટાંગણ બહાર ₹40 પ્રતિ કિલોના ભાવે ખાંડનું વિતરણ કરીને મોંઘવારી સામે વિરોધ નોંધાવ્યો હતો.

કોંગ્રેસના જણાવ્યા મુજબ જીવનજરૂરી ચીજવસ્તુઓના ભાવમાં થયેલા વધારાના કારણે મધ્યમ અને ગરીબ વર્ગના પરિવારો પર આર્થિક બોજ વધી રહ્યો છે. ખાંડના વધતા ભાવને મુદ્દો બનાવી જિલ્લા કોંગ્રેસ અને શહેર કોંગ્રેસ સમિતિ દ્વારા આ વિરોધ કાર્યક્રમનું આયોજન કરવામાં આવ્યું હતું.

નવસારી મનપા કચેરી બહાર બજારભાવની સરખામણીએ ઓછા ભાવે ખાંડનું વિતરણ કરવામાં આવતા તેને ખરીદવા માટે મોટી સંખ્યામાં લોકો પહોંચ્યા હતા અને લાંબી કતારો જોવા મળી હતી. કોંગ્રેસ અગ્રણીઓના જણાવ્યા મુજબ કાર્યક્રમ દરમિયાન આશરે 1500 કિલો ખાંડ ₹40 પ્રતિ કિલોના ભાવે વિતરણ કરવામાં આવી હતી.

વાંસદાના ધારાસભ્ય અનંત પટેલે જણાવ્યું હતું કે મોંઘવારીના કારણે સામાન્ય પરિવારો પર આર્થિક ભાર વધી રહ્યો છે. તેમણે જણાવ્યું કે જિલ્લા અને શહેર કોંગ્રેસ દ્વારા 1500 કિલો ખાંડ ઓછા ભાવે આપવામાં આવી છે અને જરૂર પડશે તો વધુ વ્યવસ્થા કરવામાં આવશે. સાથે જ મોંઘવારી પર નિયંત્રણ લાવી પ્રજાને રાહત આપવાની માંગ કરવામાં આવી હતી.

નવસારી શહેર કોંગ્રેસ પ્રમુખ દીપક બારોટે જણાવ્યું હતું કે જીવનજરૂરી ચીજવસ્તુઓ, શિક્ષણ અને દવાઓ સામાન્ય નાગરિકોને પરવડે તેવા ભાવે ઉપલબ્ધ થવી જોઈએ. તેમણે વડાપ્રધાનને જન્મદિવસની શુભેચ્છા પાઠવતા મોંઘવારીના મુદ્દે પ્રજાને રાહત આપવાના હેતુથી આ કાર્યક્રમ યોજાયો હોવાનું જણાવ્યું હતું.