ગણદેવીના મેંધર ગામે સરકારી જમીન પરના ગેરકાયદેસર 8 ઝીંગા તળાવો તોડી પાડ્યા

21 ગામોના ગ્રામજનોની રજૂઆત બાદ કલેક્ટરના આદેશથી તંત્રની કાર્યવાહી, 2 JCB સાથે ડિમોલિશન શરૂ

નવસારી : ગણદેવી તાલુકાના દરિયાકાંઠાના મેંધર ગામે બ્લોક નં. 903, રી-સર્વે નં. 684ની સરકારી જમીન પર વહીવટી તંત્રની મંજૂરી વિના ગેરકાયદેસર રીતે બનાવવામાં આવેલા ઝીંગા તળાવો સામે તંત્રએ કાર્યવાહી હાથ ધરી હતી. કાંઠા વિસ્તારના ગ્રામજનો તરફથી મળેલી રજૂઆતો અને ફરિયાદોને ગંભીરતાથી લઈ જિલ્લા કલેક્ટર મનીષ ગુરવાની દ્વારા વિશેષ સમિતિની રચના કરવામાં આવી હતી.

કલેક્ટરના આદેશ બાદ ચીખલી પ્રાંત અધિકારીની અધ્યક્ષતામાં ગણદેવી મામલતદાર, તાલુકા વિકાસ અધિકારી, વન વિભાગ, માર્ગ-મકાન વિભાગ, ડ્રેનેજ વિભાગ, ફિશરીઝ વિભાગ તેમજ પોલીસ સહિતના અધિકારીઓ સ્થળ પર હાજર રહ્યા હતા. રજૂ થયેલા નકશાની ચકાસણી દરમિયાન સરકારી જમીન પર ગેરકાયદેસર રીતે બનાવવામાં આવેલા ઝીંગા તળાવો અલગ જણાતા જમીન ખુલ્લી કરવાની કાર્યવાહી શરૂ કરવામાં આવી હતી.

2 JCB સહિતની મશીનરીની મદદથી સરકારી જમીન પર બનાવાયેલા કુલ 8 ગેરકાયદેસર ઝીંગા તળાવો તોડી પાડવાની કાર્યવાહી હાથ ધરવામાં આવી હતી. સમગ્ર ડિમોલિશન દરમિયાન કાયદો અને વ્યવસ્થા જળવાઈ રહે તે માટે સ્થાનિક પોલીસ દ્વારા પૂરતો બંદોબસ્ત ગોઠવવામાં આવ્યો હતો.

તંત્રએ સ્પષ્ટ કર્યું છે કે સરકારી જમીન પર કોઈપણ પ્રકારનું ગેરકાયદેસર દબાણ ચલાવી લેવામાં આવશે નહીં અને આગામી દિવસોમાં પણ આવી કાર્યવાહી ચાલુ રહેશે. સરકારી જમીન તથા પર્યાવરણને નુકસાન પહોંચાડતી ગેરકાયદેસર પ્રવૃત્તિ કરનારાઓ સામે કડક કાયદેસરની કાર્યવાહી કરવામાં આવશે.

ઉલ્લેખનીય છે કે ગણદેવી તાલુકામાં તાજેતરમાં સર્જાયેલા વિનાશક પૂર પાછળ ખાડી વિસ્તારમાં બનાવાયેલા ગેરકાયદેસર ઝીંગા તળાવો જવાબદાર હોવાના આક્ષેપ સાથે દરિયાકાંઠાના 21 ગામોના આગેવાનો અને રહીશોએ જિલ્લા કલેક્ટરને આવેદનપત્ર આપી તળાવો તાત્કાલિક દૂર કરવાની માંગ કરી હતી.