મરોલીમાં ખુલ્લી જીપ પર યુવાનોના જોખમી સ્ટંટનો વીડિયો વાયરલ

કાર્ટૂન માસ્ક પહેરી બોનેટ અને છત પર બેસીને ડાન્સ કરતા રીલ બનાવી કાયદાના લીરેલીરા ઉડાવ્યા

નવસારી : જલાલપોર તાલુકાના મરોલી ગામમાં રાત્રિના સમયે કેટલાક યુવાનો ખુલ્લી જીપની છત અને બોનેટ પર બેસીને ડાન્સ અને જોખમી સ્ટંટ કરતા હોવાનો વીડિયો સોશિયલ મીડિયામાં વાયરલ થયો છે. યુવાનોએ માથા પર ટેડી બિયર અને કાર્ટૂન કેરેક્ટરના માસ્ક પહેરી ચાલુ જીપ પર રીલ બનાવી પોતાના જીવને જોખમમાં મૂક્યો હતો.

હાલમાં સોશિયલ મીડિયામાં વાયરલ થવા માટે યુવાનોમાં અલગ-અલગ પ્રકારની રીલ બનાવવાનો ક્રેઝ વધ્યો છે. નવસારી જિલ્લામાં અગાઉ પણ જોખમી સ્ટંટના વીડિયો વાયરલ થયા બાદ સ્થાનિક પોલીસે યુવાનોને કાયદાનું ભાન કરાવ્યું હતું.

મરોલીમાં વાયરલ થયેલા વીડિયોમાં યુવાનો જાહેર રસ્તા પર ચાલુ જીપની છત અને બોનેટ પર બેસીને બેફામ ડાન્સ અને સ્ટંટ કરતા જોવા મળે છે. આવા સ્ટંટને કારણે માત્ર તેમના પોતાના જીવને જ નહીં, પરંતુ રસ્તા પરના અન્ય વાહનચાલકો અને ટ્રાફિક વ્યવસ્થાને પણ જોખમ ઊભું થાય છે.

ચાલતા વાહન પર બેસીને મુસાફરી કરવી અથવા સ્ટંટ કરવો ગંભીર જોખમરૂપ છે. ત્યારે આવા જોખમી સ્ટંટ કરનાર યુવાનોની ઓળખ કરી તેમની સામે યોગ્ય પોલીસ કાર્યવાહી કરવામાં આવે તેવી માંગ ઉઠી છે.