નવસારીમાં 6 ગણેશ મંડળોના સંચાલકો અને 5 મૂર્તિકારો વિરુદ્ધ ગુનો દાખલ

12 ફૂટથી વધુ ઊંચાઈની ગણેશજીની મૂર્તિ સ્થાપવા અને બનાવવાના મામલે જાહેરનામા ભંગની કાર્યવાહી

નવસારી : નવસારી જિલ્લા કલેક્ટર અને જિલ્લા મેજિસ્ટ્રેટ દ્વારા પ્રસિદ્ધ કરાયેલા જાહેરનામા મુજબ શહેરમાં 12 ફૂટથી વધુ ઊંચાઈની ગણેશજીની મૂર્તિ સ્થાપવા પર પ્રતિબંધ હોવા છતાં કેટલીક જગ્યાએ જાહેરનામાનો ભંગ કરવામાં આવ્યો હોવાનો મામલો સામે આવ્યો છે.

આ મામલે નવસારી ટાઉન પોલીસે 12 ફૂટથી વધુ ઊંચાઈની ગણેશજીની મૂર્તિ સ્થાપનાર મંડળોના સંચાલકો તેમજ આવી મૂર્તિઓ બનાવનાર મૂર્તિકારો વિરુદ્ધ કુલ 6 ગુનાઓ નોંધી કાયદેસરની કાર્યવાહી હાથ ધરી છે.

પોલીસ કાર્યવાહી હેઠળ સ્વસ્તિક યુવક મંડળના આયોજક ગોપાલભાઈ કરશનભાઈ ભરવાડ અને રોહિત મૂર્તિ આર્ટના સુરેશભાઈ પરભુભાઈ બોરડીયા સામે ગુનો નોંધાયો છે. કડીયાવાડના રાજા મંડળના આયોજક પિયુષભાઈ જેરામભાઈ પટેલ અને મૂર્તિકાર દિપકભાઈ નાગજીભાઈ હેલરીયા સામે પણ કાર્યવાહી કરવામાં આવી છે.

આ ઉપરાંત મંડળ આયોજક અનિકેતભાઈ કમલેશભાઈ પટેલ અને આર.કે. મૂર્તિ આર્ટના સંજયભાઈ પટેલ, પ્રજાપતિ બાળ ગણેશ મંડળના આયોજક કિરણભાઈ હેમંતભાઈ મિસ્ત્રી અને મૂર્તિકાર ગૌરાંગ મંગળ જાના સામે ગુનો નોંધાયો છે.

શિવાજી ગણેશ યુવક મંડળના આયોજક પંકજભાઈ કિશોરભાઈ ભાસ્કર અને મૂર્તિકાર પંકજભાઈ તેમજ શ્રી સિદ્ધિ વિનાયક મિત્ર મંડળના આયોજક પ્રજ્ઞેશભાઈ પ્રકાશભાઈ કુકણા અને મૂર્તિકાર સુરેશભાઈ પરભુભાઈ બોરડીયા સામે પણ જાહેરનામા ભંગ બદલ ગુનો નોંધવામાં આવ્યો છે.

આમ, નવસારી ટાઉન પોલીસે જાહેરનામાના ભંગ બદલ 6 મંડળોના સંચાલકો અને 5 મૂર્તિકારો સામે કાયદેસરની કાર્યવાહી હાથ ધરી છે.