ગણેશ વિસર્જનને લઈને બીલીમોરા નગરપાલિકામાં સમીક્ષા બેઠક યોજાઈ

ટ્રાફિક, વીજ કેબલ, સુરક્ષા અને વિસર્જન સ્થળની વ્યવસ્થા અંગે ચર્ચા; તમામ વિભાગોને સંકલન સાથે તૈયારીઓ પૂર્ણ કરવા સૂચના

બીલીમોરા : બીલીમોરા શહેરમાં આગામી ગણેશ વિસર્જનને ધ્યાનમાં રાખીને બીલીમોરા નગરપાલિકા કચેરી ખાતે મહત્વપૂર્ણ સમીક્ષા બેઠક યોજાઈ હતી. બેઠકમાં નગરપાલિકા પ્રમુખ, ચીફ ઓફિસર, બીલીમોરા પોલીસ સ્ટેશનના પી.આઈ., જીઈબીના એન્જિનિયર તેમજ નગરપાલિકાના જવાબદાર અધિકારી-કર્મચારીઓ ઉપસ્થિત રહ્યા હતા.

બેઠક દરમિયાન ગણેશ વિસર્જનના રૂટ પર ટ્રાફિક વ્યવસ્થા, વીજળીના કેબલ, વિસર્જન સ્થળની તૈયારી, સુરક્ષા વ્યવસ્થા તેમજ વિસર્જન કામગીરીમાં જોડાનારા સ્ટાફની જવાબદારીઓ અંગે વિગતવાર ચર્ચા કરવામાં આવી હતી.

વિસર્જન દરમિયાન કોઈપણ પ્રકારની મુશ્કેલી ઊભી ન થાય અને ગણેશભક્તો તથા શહેરના નાગરિકોને સરળતા રહે તે માટે સંબંધિત તમામ વિભાગો વચ્ચે યોગ્ય સંકલન જાળવી જરૂરી કામગીરી સમયસર પૂર્ણ કરવા સૂચનાઓ આપવામાં આવી હતી.

ખાસ કરીને વિસર્જનના રૂટ પર ટ્રાફિકને અડચણરૂપ પરિસ્થિતિ ટાળવા, વીજ કેબલ સંબંધિત જરૂરી તકેદારી રાખવા તેમજ વિસર્જન કામગીરી માટેના સ્ટાફને જરૂરી માર્ગદર્શન અને સુવિધાઓ ઉપલબ્ધ કરાવવા પર ભાર મૂકવામાં આવ્યો હતો.

નગરપાલિકા અને પોલીસ તંત્ર દ્વારા ગણેશ વિસર્જન શાંતિપૂર્ણ, સલામત અને સુવ્યવસ્થિત રીતે સંપન્ન થાય તે માટે તમામ જરૂરી તૈયારીઓ હાથ ધરવામાં આવી રહી છે.