વાંસદાના ઉમરકુઈમાં નવયુવક ગણેશ મંડળ દ્વારા ગણેશજીને ભાવભીની વિદાય

વાજતે-ગાજતે વિસર્જન શોભાયાત્રા નીકળી; ‘ગણપતિ બાપ્પા મોરિયા’ના જયઘોષ સાથે ભક્તોએ બાપ્પાને વિદાય આપી

વાંસદા તાલુકાના ઉમરકુઈ ગામના વાઘમાર્યા ફળિયામાં નવયુવક ગણેશ મંડળ દ્વારા ગણેશ ચતુર્થી નિમિત્તે સ્થાપિત ગણપતિ બાપ્પાને શ્રદ્ધા અને ભક્તિભાવપૂર્વક ભાવભીની વિદાય આપવામાં આવી હતી.

વિસર્જન પ્રસંગે સાઈ સરકાર ડીજેના તાલે વાજતે-ગાજતે શોભાયાત્રા નીકળી હતી. ગણેશ મંડળના સભ્યો તથા મોટી સંખ્યામાં ભક્તોએ બાપ્પાની આરતી, પૂજન અને સ્તુતિ કરી હતી. ત્યારબાદ મહાપ્રસાદનું આયોજન કરવામાં આવ્યું હતું.

વિસર્જન યાત્રા દરમિયાન ઢોલ-નગારા અને ડીજેના તાલે ‘ગણપતિ બાપ્પા મોરિયા, આવતા વર્ષે વહેલા આવજો’ના જયઘોષથી સમગ્ર વાતાવરણ ભક્તિમય બન્યું હતું. ભક્તોએ શ્રદ્ધાપૂર્વક ગણેશજીની પ્રતિમાનું નદીમાં વિસર્જન કર્યું હતું.

ગણેશજીની સ્થાપનાથી લઈને વિસર્જન સુધીના સમગ્ર આયોજનમાં ગામના યુવકો સંદીપ ગાંવિત, શંકરભાઈ વાઘમાર્યા, ગવળી નરસુંભાઈ તથા અન્ય યુવકોએ ઉત્સાહપૂર્વક સાથ-સહકાર આપ્યો હતો. ગણેશોત્સવ દરમિયાન રાત્રિના સમયે ભાવિક ભક્તો ગરબાના તાલે ઝૂમ્યા હતા.

ગણેશજીની વિદાય સમયે ભક્તોમાં ભાવુકતા જોવા મળી હતી અને સૌએ આગામી વર્ષે બાપ્પા વહેલા પધારે તેવી પ્રાર્થના કરી હતી.