ખડસુપા ગામે ગાડરિયા તળાવના ટેન્ડર વિવાદમાં તલાટી-સરપંચની ભૂમિકા પર સવાલ

ટેન્ડર પ્રક્રિયામાં પારદર્શિતાના અભાવે ઠરાવ રદ થયો છતાં ખાતાકીય કાર્યવાહી કેમ નહીં? જિલ્લા વિકાસ અધિકારી સમક્ષ તપાસની માંગ

નવસારી : ખડસુપા ગામના ગાડરિયા તળાવને ઊંડું કરવા બાબતનો રદ થયેલો ઠરાવ ફરી વિવાદમાં આવ્યો છે. ટેન્ડર પ્રક્રિયામાં પારદર્શિતાનો અભાવ જણાતા નવસારી તાલુકા વિકાસ અધિકારીએ ઠરાવ રદ કર્યો હતો. ત્યારે ટેન્ડર પ્રક્રિયા દરમિયાન થયેલી ભૂલોને કારણે ઠરાવ રદ થયો હોવા છતાં તલાટી અને સરપંચ સામે ખાતાકીય કાર્યવાહી કેમ થઈ નથી તે અંગે સવાલ ઊભા થયા છે. સમગ્ર મામલે જિલ્લા વિકાસ અધિકારી દ્વારા તપાસ કરવામાં આવે તો હકીકત બહાર આવી શકે તેવી રજૂઆત કરવામાં આવી છે.

નવસારી તાલુકાના ખડસુપા ગામે બ્લોક/સર્વે નં. 917નું ગાડરિયા તળાવ ઊંડું કરવા માટે ગ્રામ પંચાયતના તલાટી ડેનીશભાઈ વ્યાસ અને સરપંચ જયેશભાઈ હળપતિએ 30 ડિસેમ્બર, 2023ના રોજ ઇજારદાર સુરેશભાઈ બળદેવભાઈ જોગરાણાનું ટેન્ડર મંજૂર કરી ઠરાવ કર્યો હતો. જોકે તળાવ ઊંડું કરવા અંગે નવસારી તાલુકા વિકાસ અધિકારી સમક્ષ વાંધા અરજી કરવામાં આવતા સુનાવણી હાથ ધરવામાં આવી હતી.

સુનાવણી દરમિયાન ગ્રામ પંચાયત દ્વારા હાથ ધરાયેલી ટેન્ડર પ્રક્રિયા સહિતની કામગીરીમાં પારદર્શિતાનો અભાવ જણાતા ઇજારદારના પક્ષમાં કરાયેલો ઠરાવ રદ કરવામાં આવ્યો હતો. આ ઠરાવ રદ થયાની લેખિત કે મૌખિક જાણ ઇજારદારને કરવાની હોવા છતાં તલાટી અને સરપંચ દ્વારા જાણ કરવામાં આવી ન હોવાનો આક્ષેપ છે.

નવસારી ટીડીઓએ ત્રણ મુખ્ય કારણોસર ઠરાવ રદ કર્યો હોવાનું જણાવાયું છે. જેમાં તળાવ ઊંડું કરવા ભાવપત્રકો મંગાવવા દૈનિક અખબારમાં જાહેરાત પ્રસિદ્ધ ન કરવી, ભાવપત્રકો રજિસ્ટર્ડ પોસ્ટ કે સાદી પોસ્ટના બદલે હાથોહાથ મેળવવા અને ગ્રામ પંચાયત તથા ઇજારદાર વચ્ચેના સમજૂતી કરારમાં વિકાસ ફાળાની રકમમાં ભૂલ તથા ક્ષેત્રફળનો ઉલ્લેખ ન હોવાનો સમાવેશ થાય છે.

આ બાબતોને કારણે ટેન્ડર પ્રક્રિયામાં પારદર્શિતાનો અભાવ હોવાનું સામે આવ્યું હોવાનો દાવો કરવામાં આવ્યો છે. ગ્રામ પંચાયતની ટેન્ડર પ્રક્રિયા નિયમો મુજબ અને પારદર્શક રીતે થાય તેની જવાબદારી તલાટી સહિત સંબંધિત સત્તાધિકારીઓની હોય છે. તેથી ઠરાવ રદ થવા પાછળ પ્રક્રિયાત્મક ખામી જવાબદાર હોય તો તલાટી અને સરપંચ સામે ખાતાકીય કાર્યવાહી કેમ કરવામાં આવી નથી તે મુદ્દો ચર્ચામાં આવ્યો છે.

આક્ષેપ મુજબ ઠરાવ રદ થયા બાદ પણ ઇજારદારને તળાવ ખોદવા માટે કહેવામાં આવ્યું હતું. જેથી રદ થયેલા ઠરાવ બાદ ઇજારદારને કામ ચાલુ રાખવાની મંજૂરી કોણે અને કયા આધાર પર આપી તેની તપાસ કરવાની માંગ પણ ઉઠી છે.

રદ થયેલા ઠરાવ અંગે ખાણ-ખનીજ વિભાગ અને મામલતદારને પણ જાણ ન કર્યાનો આક્ષેપ

ઠરાવ રદ થયા બાદ સંબંધિત ખાણ-ખનીજ વિભાગ અને નવસારી ગ્રામ્ય મામલતદારને જાણ કરવાની હોવા છતાં તેમને પણ જાણ કરવામાં આવી ન હોવાનો આક્ષેપ કરવામાં આવ્યો છે. આથી ઠરાવ રદ થયા બાદ પણ ઇજારદારને તળાવ ખોદવાની મંજૂરી કયા આધારે આપવામાં આવી તે અંગે તપાસ જરૂરી હોવાનું જણાવાયું છે.

નવા તલાટીએ કરેલા નવા ઠરાવની તપાસની પણ માંગ

હાલ ખડસુપા ગામે નવા તલાટી ફરજ પર છે અને ગાડરિયા તળાવ ઊંડું કરી માટી લઈ જવાનું કામ અન્ય ઇજારદારને આપવામાં આવ્યું હોવાનું જણાવાયું છે. આ નવી ટેન્ડર પ્રક્રિયા નિયમો મુજબ હાથ ધરવામાં આવી છે કે નહીં તેની પણ ચકાસણી કરવાની માંગ કરવામાં આવી છે. સાથે જ અગાઉના ઇજારદારે આપેલા ભાવ કરતા ઓછા ભાવે કામ કરનાર અન્ય ઇજારદારને મંજૂરી કેવી રીતે આપવામાં આવી તે મુદ્દે પણ તપાસ કરવાની માંગ ઉઠી છે.