નવસારી માછી સમાજ દ્વારા ભવ્ય નિઃશુલ્ક સર્વરોગ નિદાન કેમ્પ યોજાયો

નામાંકિત તબીબોએ દર્દીઓની વિનામૂલ્યે તપાસ કરી, શુગર-બ્લડપ્રેશર-ઈસીજી સહિતના ટેસ્ટ પણ મફત કરાયા

નવસારી : સ્થાનિક રહીશો તથા જરૂરિયાતમંદ પરિવારોને ઉત્તમ સ્વાસ્થ્ય સેવાઓ મળી રહે તેવા ઉમદા હેતુથી શ્રી નવસારી માછી સમાજ દ્વારા ભવ્ય નિઃશુલ્ક સર્વરોગ નિદાન કેમ્પનું સફળ આયોજન કરવામાં આવ્યું હતું. દીપ પ્રાગટ્ય અને પ્રાર્થના સાથે કેમ્પનો શુભારંભ કરવામાં આવ્યો હતો.

કેમ્પમાં શહેરના નામાંકિત તબીબો ડૉ. દિપાલી ટંડેલ (આંખ), ડૉ. જીગર ટંડેલ (દાંત), ડૉ. સંસ્કૃતિ ટંડેલ (ફિઝિયોથેરાપી), ડૉ. શ્રેય હિરપરા (ઓર્થોપેડિક), ડૉ. પ્રિયાંક ગાંધી, ડૉ. દેવાંશ પટેલ (જનરલ સર્જન), ડૉ. ચિરાગ દાવરા (યુરો સર્જન), ડૉ. નિલેશ ચૌધરી (ન્યુરો સર્જન) તથા ડૉ. જીજ્ઞા પટેલ (કાર્ડિયોલોજિસ્ટ) દ્વારા દર્દીઓની વિનામૂલ્યે તપાસ કરવામાં આવી હતી. ચિરાગ ઘડિયા દ્વારા સ્વસ્થ જીવનશૈલી અંગે માર્ગદર્શન પણ આપવામાં આવ્યું હતું.

આ ઉપરાંત જરૂરિયાતમંદ દર્દીઓ માટે સ્થળ પર જ શુગર, બ્લડપ્રેશર, ઈ.સી.જી. અને કેલ્શિયમ સહિતના લેબોરેટરી ટેસ્ટ સંપૂર્ણપણે મફત કરવામાં આવ્યા હતા.

સમગ્ર આયોજનને સફળ બનાવવા પ્રમુખ ઈશ્વરભાઈ એન. ટંડેલ, મંત્રી રમણીકલાલ વી. ટંડેલ, કન્વીનરો કૃષ્ણવદનભાઈ એસ. ટંડેલ, નિલયકુમાર એચ. ટંડેલ, ડૉ. અરવિંદભાઈ આર. ટંડેલ તથા વ્યવસ્થાપક સમિતિએ જહેમત ઉઠાવી હતી. અંતે સમાજના હોદ્દેદારોએ સેવા આપનાર તમામ ડોક્ટરો, સહયોગીઓ તેમજ મમતા મંદિર ટ્રસ્ટ, વિજલપોરનો હૃદયપૂર્વક આભાર વ્યક્ત કર્યો હતો.