નવસારીના સ્ટેશનરી વેપારીઓએ પાઠ્ય પુસ્તક મંડળ-એમેઝોન એમઓયુનો વિરોધ કર્યો

સ્થાનિક વેપારીઓ અને કર્મચારીઓની આજીવિકા પર અસર થવાની ભીતિ; એમઓયુ તાત્કાલિક રદ કરવાની માંગ

નવસારી : ગુજરાત રાજ્ય પાઠ્ય પુસ્તક મંડળ અને એમેઝોન વચ્ચે થયેલા એમઓયુના સમાચારને લઈને ધ નવસારી સ્ટેશનરી મર્ચન્ટ્સ એન્ડ મેન્યુફેક્ચરિંગ એસોસિએશન દ્વારા ચિંતા વ્યક્ત કરવામાં આવી છે.

એસોસિએશનના જણાવ્યા મુજબ, પાઠ્ય પુસ્તકોના વેચાણ અને વિતરણ સાથે સંકળાયેલા નવસારી સહિત ગુજરાતભરના નાના-મોટા વેપારીઓ તથા તેમના કર્મચારીઓના રોજગાર અને પરિવારની આજીવિકા ઉપર આ નિર્ણયથી નકારાત્મક અસર થવાની શક્યતા છે. સ્થાનિક વેપારીઓ વર્ષોથી પાઠ્ય પુસ્તકોના વિતરણ અને વેચાણની વ્યવસ્થા સાથે જોડાયેલા છે.

એસોસિએશને જણાવ્યું છે કે જો વિદેશી કંપનીને સીધો વ્યવસાયિક લાભ આપવામાં આવશે તો સ્થાનિક નાના અને મધ્યમ વેપારીઓ માટે ગંભીર આર્થિક મુશ્કેલીઓ ઊભી થઈ શકે છે અને રોજગારની તકો પર પણ અસર પડી શકે છે. એક તરફ સરકાર દ્વારા ‘આત્મનિર્ભર ભારત’ અને સ્થાનિક વ્યવસાયને પ્રોત્સાહન આપવાની વાત કરવામાં આવે છે, ત્યારે બીજી તરફ સ્થાનિક વેપારીઓને અસર થાય તેવો નિર્ણય યોગ્ય નથી.

એસોસિએશને ગુજરાત સરકાર સમક્ષ ગુજરાત રાજ્ય પાઠ્ય પુસ્તક મંડળ અને એમેઝોન વચ્ચે થયેલું એમઓયુ તાત્કાલિક રદ કરવા તથા સ્થાનિક વેપારીઓ, વિતરકો અને તેમના કર્મચારીઓના હિતમાં યોગ્ય નિર્ણય લેવા માંગ કરી છે.

યોગ્ય કાર્યવાહી નહીં થાય તો આંદોલન કરીશું : હેમલભાઈ શાહ

ધ નવસારી સ્ટેશનરી મર્ચન્ટ્સ એન્ડ મેન્યુફેક્ચરિંગ એસોસિએશનના પ્રમુખ હેમલભાઈ શાહે જણાવ્યું હતું કે, સ્થાનિક વેપારીઓને પડતી મુશ્કેલીઓ અંગે યોગ્ય કાર્યવાહી કરવામાં નહીં આવે તો નવસારી જિલ્લાના પાઠ્યપુસ્તકના વેપારીઓ, કર્મચારીઓ તથા તેમના પરિવારો સાથે મળીને ગાંધી ચિંધ્યા માર્ગે આંદોલન કરવામાં આવશે.