નવસારીની અનેરી શેલાડિયાને બી.કોમ.ની પદવી સાથે છ મેડલ અને બે પ્રાઈઝ એનાયત

નવસારીની નારણલાલા કોલેજ ઓફ કોમર્સ એન્ડ મેનેજમેન્ટની વિદ્યાર્થિનીનો 9.15 સી.જી.પી.એ. મેળવી યુનિવર્સિટીમાં શ્રેષ્ઠ દેખાવ

6 મેડલ | 2 પ્રાઈઝ | 9.15 CGPA | B.Com. — યુનિવર્સિટી સ્તરે ઉત્કૃષ્ટ દેખાવ

સુરત : સફળતા માત્ર ગુણપત્રકમાં નહીં, પરંતુ સપનાઓને સાકાર કરવાની દિશામાં ભરાયેલા મક્કમ પગલામાં વસે છે. આ ઉક્તિને નવસારીની વિદ્યાર્થિની અનેરી હસમુખભાઈ શેલડિયાએ સાચા અર્થમાં સાબિત કરી છે. વીર નર્મદ દક્ષિણ ગુજરાત યુનિવર્સિટીના 59મા પદવીદાન સમારોહમાં અનેરીએ પોતાની શૈક્ષણિક સિદ્ધિઓથી માત્ર પરિવાર જ અને નવસારી જિલ્લાનું ગૌરવ વધાર્યું છે.

નવસારીના એરુ ચાર રસ્તા સ્થિત એવન્યુ રેસિડન્સીમાં રહેતી અને નારણલાલા કોલેજ ઓફ કોમર્સ એન્ડ મેનેજમેન્ટમાં અભ્યાસ કરનારી અનેરીએ માર્ચ-2026ની બી.કોમ. પરીક્ષામાં 9.15 સી.જી.પી.એ. મેળવી યુનિવર્સિટી સ્તરે ઉત્કૃષ્ટ દેખાવ કર્યો છે. તેમના શ્રેષ્ઠ પ્રદર્શન બદલ રાજ્યપાલ આચાર્ય દેવવ્રતજીના હસ્તે છ મેડલ અને બે પ્રતિષ્ઠિત પ્રાઈઝ એનાયત કરવામાં આવ્યા છે.

અનેરીને મળેલા સન્માનોમાં મંગલ્યા મેડલ, બાલદેવસિંહ ચંદ્રસિંહ મહીડા ગોલ્ડ મેડલ, લેટ રતિલાલ અને લેટ નાઓશીરવાન કરંજિયા ગોલ્ડ મેડલ, ભાવનાબેન પચ્ચીગર ગોલ્ડ મેડલ (ઓવરઓલ ફર્સ્ટ રેન્ક) અને ભાવનાબેન પચ્ચીગર ગોલ્ડ મેડલ (એડવાન્સ્ડ એકાઉન્ટિંગ એન્ડ ઓડિટિંગ) જેવા પ્રતિષ્ઠિત એવોર્ડનો સમાવેશ થાય છે. સાથે જ તેને શ્રી અશ્વિન મહેતા પ્રાઈઝ અને હેમલબેન સુંદરલાલ દેસાઈ પ્રાઈઝ પણ મળ્યા છે.

અનેરીનું UPSC પાસ કરી દેશસેવા કરવાનું સ્વપ્ન

બી.કોમ.ની પરીક્ષામાં 9.15 સી.જી.પી. મેળવી યુનિવર્સીટી સ્તરે મેળવેલી સિદ્ધિ અંતિમ મુકામ નથી. તેના સપનાઓની ઊંચાઈ હજુ ઘણી મોટી છે. નવસારીની અનેરી શેલડીયા આગામી સમયમાં યુપીએસસી સિવિલ સર્વિસિસ પરીક્ષા પાસ કરીને આઈએએસ અથવા આઈપીએસ અધિકારી બનવા માંગે છે. દેશના વિકાસ, સુશાસન અને જનકલ્યાણ માટે કાર્ય કરવાની તેની પ્રબળ ઇચ્છા છે.