નવસારી જિલ્લા કલેક્ટર મનીષ ગુરવાનીએ ચીખલીનાં ઘોડવણી અને માંડવખડક ગામની મુલાકાત લીધી

આંગણવાડી, સસ્તા અનાજની દુકાન અને ગ્રામ પંચાયતની કામગીરીની સમીક્ષા; આરોગ્ય, પોષણ, ઈ-કેવાયસી તથા ગ્રામસભાની તૈયારીઓ અંગે જરૂરી માર્ગદર્શન આપ્યું

નવસારી : નવસારી જિલ્લા કલેક્ટર મનીષ ગુરવાનીએ ચીખલી તાલુકાનાં ઘોડવણી અને માંડવખડક ગામની મુલાકાત લઈ વિવિધ સરકારી યોજનાઓ, પ્રાથમિક સુવિધાઓ, આરોગ્ય અને પોષણલક્ષી સેવાઓ તથા વિકાસકામોની સ્થળ પર સમીક્ષા કરી હતી.

મુલાકાત દરમિયાન કલેક્ટરે સૌપ્રથમ આંગણવાડી કેન્દ્રમાં નોંધાયેલાં બાળકોની સંખ્યા, કુપોષિત બાળકોની સ્થિતિ તથા બાળકોને આપવામાં આવતી પોષણલક્ષી સેવાઓ અંગે વિગતવાર માહિતી મેળવી હતી. કુપોષિત બાળકો માટે કરવામાં આવતી કામગીરી અને પોષણ કીટની ઉપલબ્ધતાની પણ સમીક્ષા કરવામાં આવી હતી.

ત્યારબાદ સરકાર માન્ય સસ્તા અનાજની દુકાનની મુલાકાત લઈ અનાજના જથ્થાની ઉપલબ્ધતા, લાભાર્થીઓને નિયમિત વિતરણ તથા ઈ-કેવાયસી કામગીરીની સ્થિતિ અંગે માહિતી મેળવી હતી. અનાજના વિતરણમાં ગ્રામજનોને કોઈ મુશ્કેલી પડતી હોય કે ફરિયાદ હોય તે અંગે પણ જાણકારી મેળવી હતી.

ગ્રામ પંચાયતની મુલાકાત દરમિયાન જિલ્લામાંથી મળતી વિવિધ ગ્રાન્ટ, તે અંતર્ગત હાથ ધરાયેલાં વિકાસકામો અને ગામમાં ઉપલબ્ધ પ્રાથમિક સુવિધાઓ અંગે માહિતી મેળવવામાં આવી હતી. ગામમાં કાર્યરત આંગણવાડી કેન્દ્રોની સંખ્યા તથા આરોગ્ય સબ-સેન્ટરની કામગીરીની પણ સમીક્ષા કરવામાં આવી હતી.

કલેક્ટરે ગામમાં સગર્ભા મહિલાઓ અને હાઈ રિસ્ક સગર્ભા માતાઓની સંખ્યા તથા તેમના આરોગ્યની જાળવણી અને નિયમિત દેખરેખ માટે આરોગ્ય વિભાગ દ્વારા લેવાતાં પગલાં અંગે વિગતો મેળવી હતી. માતા અને બાળ આરોગ્યની કામગીરી અસરકારક બને તથા પાત્ર લાભાર્થીઓને આરોગ્યલક્ષી સેવાઓનો સમયસર લાભ મળે તે માટે જરૂરી માર્ગદર્શન આપ્યું હતું.

આગામી ૨જી ઓક્ટોબરે યોજાનારી ગ્રામસભાની તૈયારીઓ અંગે પણ સંબંધિત અધિકારીઓ પાસેથી માહિતી મેળવવામાં આવી હતી. ગ્રામસભામાં વિવિધ વિભાગોની યોજનાઓ, વિકાસકામો તથા ગ્રામજનોના પ્રશ્નોની અસરકારક રજૂઆત અને જરૂરી કાર્યવાહી થાય તે માટે તમામ તૈયારીઓ સમયસર પૂર્ણ કરવા સૂચના આપવામાં આવી હતી.

બંને ગામોમાં કલેક્ટરે ગ્રામજનોની રજૂઆતો અને સ્થાનિક જરૂરિયાતો સાંભળી સંબંધિત વિભાગોના અધિકારીઓને જરૂરી કાર્યવાહી કરવા જણાવ્યું હતું. સરકારની વિવિધ યોજનાઓનો લાભ દરેક પાત્ર લાભાર્થી સુધી પહોંચે અને ગ્રામ્ય વિસ્તારોમાં પ્રાથમિક સુવિધાઓ વધુ સુદૃઢ બને તે માટે વહીવટી તંત્ર દ્વારા સતત કામગીરી કરવામાં આવી રહી છે.

મુલાકાત દરમિયાન ચીખલી પ્રાંત અધિકારી નિશાંત કુંગાશીયા, મામલતદાર હિરેન મૈસુરીયા, તાલુકા વિકાસ અધિકારી ભાવનાબેન યાદવ, સરપંચ, તલાટી તથા ગામના આગેવાનો ઉપસ્થિત રહ્યા હતા.