નવસારી જિલ્લા કલેક્ટર મનીષ ગુરવાનીના અધ્યક્ષસ્થાને સ્વચ્છતા હી સેવા-૨૦૨૬ અંતર્ગત બેઠક યોજાઈ

૨જી ઓક્ટોબરે ચીખલીના મજીગામ ખાતે કેન્દ્રીય મંત્રી સી.આર. પાટીલના વડપણ હેઠળ કાર્યક્રમ યોજાશે; મહેસૂલી કર્મચારીઓ વિશેષ સ્વચ્છતા અભિયાન હાથ ધરશે

નવસારી : નવસારી જિલ્લા કલેક્ટર મનીષ ગુરવાનીના અધ્યક્ષસ્થાને સ્વચ્છતા હી સેવા-૨૦૨૬ અંતર્ગત આગામી ૨જી ઓક્ટોબરે ચીખલીના મજીગામ ખાતે યોજાનારા વિવિધ કાર્યક્રમોના આયોજન અને સુચારુ અમલીકરણ અંગે બેઠક યોજાઈ હતી.

બેઠકમાં જિલ્લા કલેક્ટરે જણાવ્યું હતું કે, ૨જી ઓક્ટોબરે ગાંધી જયંતિના અવસરે ચીખલીના મજીગામ ખાતે કેન્દ્રીય મંત્રી સી.આર. પાટીલના વડપણ હેઠળ સ્વચ્છતા હી સેવા અંતર્ગત વિશેષ કાર્યક્રમનું આયોજન કરવામાં આવશે. કાર્યક્રમને સફળ બનાવવા સંબંધિત તમામ વિભાગોના અધિકારીઓ તથા કર્મચારીઓને પરસ્પર સંકલન સાથે કામગીરી કરવા સૂચના આપવામાં આવી હતી.

આ પ્રસંગે મહેસૂલી વિભાગના અધિકારીઓ અને કર્મચારીઓ દ્વારા તાલુકાઓમાં વિશેષ સ્વચ્છતા અભિયાન હાથ ધરવામાં આવશે. અભિયાન દરમિયાન જાહેર સ્થળો તથા આસપાસના વિસ્તારોની સફાઈ, કચરાનું યોગ્ય વ્યવસ્થાપન તેમજ સ્વચ્છતા અંગે જનજાગૃતિ લાવવાની કામગીરી કરવામાં આવશે.

આ ઉપરાંત, આગામી ૪થી ઓક્ટોબરે મહાનગરપાલિકા, નગરપાલિકા તથા ગ્રામ્ય વિસ્તારોના અધિકારીઓ, પદાધિકારીઓ અને લોકોની સક્રિય ભાગીદારી સાથે સઘન સફાઈ ઝુંબેશ હાથ ધરવા સૂચના અપાઈ હતી. સાથે જ ‘કેચ ધ રેઈન’ અંતર્ગત વરસાદી પાણીના સંગ્રહ અને તેને લગતા કાર્યક્રમો યોજવા જણાવાયું હતું.

બેઠકમાં આગામી ૫મી અને ૬ઠ્ઠી ઓક્ટોબરે ચીખલીના મજીગામ સ્થિત દિનકર ભવન ખાતે જિલ્લા વહીવટીતંત્ર અને એલીમ્કો દ્વારા આયોજિત કેમ્પ અંગે પણ ચર્ચા કરવામાં આવી હતી. કેમ્પના સુચારુ આયોજન માટે જરૂરી વ્યવસ્થાઓ, સ્થળની તૈયારીઓ, લાભાર્થીઓને સુવિધાઓ તથા વિવિધ વિભાગો વચ્ચે સંકલન અંગે કલેક્ટરે સંબંધિત અધિકારીઓને માર્ગદર્શન અને સૂચનાઓ આપી હતી.

કલેક્ટરે સ્વચ્છતા હી સેવા અભિયાનને જનભાગીદારી સાથે વધુ વ્યાપક બનાવવા અને નાગરિકોમાં સ્વચ્છતા પ્રત્યે કાયમી જાગૃતિ કેળવાય તે માટે વિવિધ પ્રવૃત્તિઓનું આયોજન કરવા ભાર મૂક્યો હતો.

બેઠકમાં જિલ્લા વિકાસ અધિકારી કાર્તિક જીવાણી, પ્રાંત અધિકારીઓ, નાયબ જિલ્લા વિકાસ અધિકારી સહિતના અધિકારીઓ ઉપસ્થિત રહ્યા હતા.