નવસારી મહાનગરપાલિકાની સામાન્ય સભામાં વિપક્ષને ટેબલ પર જગ્યા ન મળતા વિવાદ

વિપક્ષને નોંધ કરવા પેન-કાગળ પણ ન અપાયા; આંગણવાડીઓ મનપા હસ્તક લેવા અને સોલીડ વેસ્ટ મેનેજમેન્ટ નિયમો-2016ના અમલ અંગે નિર્ણય

નવસારી : નવસારી મહાનગરપાલિકા દ્વારા શહેરના સર્વાંગી વિકાસ અને સુદ્રઢ વહીવટના ઉદ્દેશ્ય સાથે દેવીના પાર્ક સ્થિત ટાઉન હોલના કોન્ફરન્સ રૂમમાં મેયર અશોકભાઈ ધોરાજીયાના અધ્યક્ષસ્થાને સામાન્ય સભાનું આયોજન કરવામાં આવ્યું હતું.

સભામાં મનપાના ચૂંટાયેલા કોર્પોરેટરો માટે ટેબલ પાસે બેસવા ખુરશીઓ મુકવામાં આવી હતી. જોકે વોર્ડ નં. 4ના કોર્પોરેટરો પાંચ મિનિટ મોડા પહોંચતા ટેબલ પર મનપાના અધિકારીઓ અને શાસક પક્ષના કોર્પોરેટરો બેસી ગયા હતા. જેના કારણે વિપક્ષી સભ્યો માટે ટેબલ પર જગ્યા રહી ન હતી અને કર્મચારીઓ દ્વારા તેમને માત્ર ખુરશીઓ આપવામાં આવી હતી.

આ મુદ્દે વિપક્ષી નેતા પ્રભાબેન વલસાડીયાએ સભામાં આક્રોશ વ્યક્ત કર્યો હતો. તેમણે વિપક્ષને ટેબલ પાસે બેસવાની વ્યવસ્થા તેમજ નોંધ કરવા માટે પેન અને કાગળ ન ફાળવાતા મેયર અને ડેપ્યુટી મ્યુનિસિપલ કમિશનર સમક્ષ સવાલો ઉઠાવ્યા હતા. તેમણે જણાવ્યું હતું કે વિપક્ષના સભ્યોને પણ લોકોએ મત આપીને ચૂંટીને મોકલ્યા છે. સાથે જ આગામી સામાન્ય સભામાં વિપક્ષ માટે યોગ્ય બેઠક વ્યવસ્થા નહીં કરવામાં આવે તો નીચે બેસીને વિરોધ કરવાની ચીમકી ઉચ્ચારી હતી.

આ સામાન્ય સભામાં મહાનગરપાલિકા મ્યુનિસિપલ સ્કૂલ બોર્ડ અંતર્ગત નગર પ્રાથમિક શિક્ષણ સમિતિ તેમજ માધ્યમિક અને ઉચ્ચતર માધ્યમિક શાળા સમિતિની રચના કરવા બાબતે સર્વાનુમતે સ્વીકૃતિ આપવામાં આવી હતી.

આ ઉપરાંત સંસદસભ્યની ગ્રાન્ટ વર્ષ 2023-24 અંતર્ગત સંસ્કાર ભારતી ટ્રસ્ટ સંચાલિત શેઠ પુરુષોત્તમદાસ હરજીવનદાસ વિદ્યાલયમાં શૌચાલય બનાવવાની કામગીરીને મંજૂરી આપવામાં આવી હતી.

મેયરના અધ્યક્ષસ્થાનેથી રજૂ થયેલા વહીવટી અને નીતિવિષયક મુદ્દાઓની પણ સમીક્ષા કરવામાં આવી હતી. જેમાં નવરચિત મહાનગરપાલિકાઓના કોર્પોરેટરોના માનદ વેતનની મહત્તમ મર્યાદા નક્કી કરવા બાબતે સમીક્ષા અને મંજૂરીની પ્રક્રિયા હાથ ધરાઈ હતી.

આ સાથે નવસારી મનપાના મહેકમમાં વર્ગ-1, વર્ગ-2 અને વર્ગ-3ની નિયત જગ્યાઓમાં દિવ્યાંગતા માટેની જગ્યાઓ નક્કી કરવા તેમજ મનપાની જુદી જુદી ખાસ સમિતિઓના અધિકાર અને કાર્યક્ષેત્ર માટેના નિયમોને મંજૂરી આપવા અંગે ચર્ચા થઈ હતી. જેને સભાએ બહાલી આપી હતી.

સભામાં જિલ્લા પંચાયત હસ્તકની ગ્રામ્ય વિસ્તારમાં આવેલી પરંતુ હવે શહેરી વિસ્તારમાં સમાવિષ્ટ આંગણવાડીઓને મહાનગરપાલિકા હસ્તક લેવા બાબતે ચર્ચા કરીને નિર્ણય લેવામાં આવ્યો હતો. આ પગલાથી આંગણવાડીઓનું સંચાલન વધુ સુચારુ બનશે અને બાળકો તથા મહિલાઓને તેનો સીધો લાભ મળશે તેવી અપેક્ષા વ્યક્ત કરવામાં આવી હતી.

આ ઉપરાંત શહેરની સ્વચ્છતા અને પર્યાવરણને પ્રાધાન્ય આપતા સોલીડ વેસ્ટ મેનેજમેન્ટ નિયમો-2016ના અમલીકરણ તેમજ મહાનગરપાલિકા દ્વારા પ્રસિદ્ધ બાયલોઝમાં જરૂરી સુધારા-વધારા કરવા અંગેના પ્રસ્તાવને પણ મંજૂરી આપવામાં આવી હતી.