નવસારી સહકારી ખરીદ વેચાણ સંઘમાં છેતરપીંડી કરનાર 2 ઝડપાયા

તેલના 16 ડબ્બા મંગાવી ચેક આપ્યા બાદ 47,920 રૂપિયાની છેતરપીંડી આચરી; જલાલપોર પોલીસે બંને આરોપીઓને ઝડપી પાડ્યા

નવસારી : જલાલપોર પોલીસે બાતમીના આધારે નવસારી તાલુકા સહકારી ખરીદ વેચાણ સંઘ લી., જલાલપોરમાંથી તેલના ડબ્બા મંગાવી પૈસા ન આપી છેતરપીંડી આચરનાર બે આરોપીઓને ઝડપી પાડી આગળની તજવીજ હાથ ધરી છે.

મળતી માહિતી મુજબ, નવસારી તાલુકા સહકારી ખરીદ વેચાણ સંઘ લી., જલાલપોર ખાતે કામ કરતા સેલ્સમેન હેમંતભાઈને એક ઇસમે ફોન કરી પોતે બાબુભાઈ બોલતો હોવાનું જણાવ્યું હતું. સાથે જ તેણે સંઘના મેનેજર સંજયભાઈ ધમળાછાવાળા સાથે વાત થઈ હોવાનું જણાવી તિરુપતિ કપાસિયા તેલના 8 ડબ્બા રિક્ષાવાળો લેવા આવે ત્યારે તેને આપી દેવા અને બદલામાં ચેક લઈ લેવા જણાવ્યું હતું.

બીજા દિવસે ફરી તે જ ઇસમે હેમંતભાઈને ફોન કરી રાજમોતી સિંગતેલના 8 ડબ્બા રિક્ષાવાળાને આપી ચેક લઈ લેવા જણાવ્યું હતું. જેથી હેમંતભાઈએ રિક્ષામાં તેલના ડબ્બા આપી દીધા હતા. જોકે બંને ચેક બેંકમાં જમા કરાવતા બાઉન્સ થયા હતા.

ચેક બાઉન્સ થયા હોવા અંગે હેમંતભાઈએ ફોન કરીને જાણ કરતા આરોપીએ રૂબરૂ આવી રોકડા રૂપિયા આપી જવાની ખાતરી આપી હતી. પરંતુ ત્યારબાદ તેણે પૈસા ચૂકવ્યા ન હતા અને પોતાનો ફોન પણ બંધ કરી દીધો હતો. આમ કુલ 16 તેલના ડબ્બા લઈ 47,920 રૂપિયાની છેતરપીંડી આચરવામાં આવી હોવાનું જણાતા જલાલપોર પોલીસ મથકે ફરિયાદ નોંધાવવામાં આવી હતી.

ફરિયાદના આધારે પોલીસે તપાસ હાથ ધરી મૂળ સુરતના ખાજા દાના રોડ, મોમનાવાડ, ગોપીપુરા અને હાલ સુરતના રાંદેર પોપટ મહોલ્લા ખાતે અમીરા રેસીડન્સીમાં રહેતા મોહમદ ઇકબાલ ઈબ્રાહીમ કોઠીવાલા તેમજ મૂળ મોરબીના નગરા દરવાજા અને હાલ સુરતના રાંદેર કોટ ફળી ખાતે અલ્ફ્લા રેસીડન્સીમાં રહેતા સરફરાજ મો. ઉર્ફે સમીર ઇકબાલભાઈ કાસમાણીને ઝડપી પાડ્યા હતા.

આરોપીઓની એમ.ઓ.

જલાલપોર પોલીસના જણાવ્યા મુજબ આરોપીઓ ખોટા નામ ધારણ કરી અન્ય વપરાશની ચીજવસ્તુઓ મેળવી બાદમાં નાસી છૂટી છેતરપીંડી કરવાની એમ.ઓ. ધરાવે છે.