પ્રધાનમંત્રીના નવસારી જિલ્લાના પ્રવાસ કાર્યક્રમ સંદર્ભે જિલ્લા કલેક્ટરના અધ્યક્ષસ્થાને સમીક્ષા બેઠક યોજાઈ

જિલ્લા તંત્ર દ્વારા વીવીઆઈપી સુરક્ષા, હેલિપેડ, પ્રોટોકોલ અંગે જરૂરી સુચનાઓ આપવામાં આવી

નવસારી : દેશના પ્રધાનમંત્રી નરેન્દ્ર મોદીજીના આગામી 8મી સપ્ટેમ્બરના રોજ નવસારી જિલ્લા ખાતેના પ્રવાસ કાર્યક્રમને અનુલક્ષીને પ્રોટોકોલ મુજબ કાર્યક્રમનું સુચારૂ, સલામત અને સુવ્યવસ્થિત આયોજન થાય તે હેતુથી નવસારી જિલ્લા કલેક્ટર મનીષ ગુરવાનીના અધ્યક્ષસ્થાને જિલ્લા કલેક્ટર કચેરીના સભાખંડમાં સમીક્ષા બેઠક યોજાઈ હતી.

આ બેઠકમાં જિલ્લા વિકાસ અધિકારી કાર્તિક જીવાણી, જિલ્લા પોલીસ અધિક્ષક રાહુલ પટેલ, નિવાસી અધિક કલેક્ટર જે.એન. લિખીયા, નાયબ મ્યુનિસિપલ કમિશનર, પ્રાંત અધિકારીઓ, માર્ગ અને મકાન વિભાગ, મામલતદારો તેમજ વહીવટી તંત્રના ઉચ્ચ અધિકારીઓ હાજર રહ્યા હતા. જિલ્લા કલેક્ટરે પ્રધાનમંત્રીના કાર્યક્રમ સંદર્ભે અલગ-અલગ વિભાગોની બનાવવામાં આવેલી સમિતિઓને સોંપાયેલી કામગીરી અંગે વિગતવાર સમીક્ષા કરી હતી. તમામ અધિકારીઓને પરસ્પર સંકલન જાળવીને કાર્યક્રમ સુચારૂ રીતે સંપન્ન થાય તે માટે જરૂરી સુચનાઓ આપી હતી.

સુરક્ષા અને કાયદો-વ્યવસ્થા, વી.વી.આઈ.પી. સુરક્ષા બંદોબસ્ત, પાર્કિંગ, સભા સ્થળ/હેલિપેડ ખાતે સુરક્ષા મોનિટરિંગ, એસપીજી અને અન્ય સુરક્ષા એજન્સીઓ સાથે સુચારુ સંકલન, મુખ્ય સ્ટેજ અને બેઠક વ્યવસ્થા, પ્રોટોકોલ મુજબ મંચ પર અગ્રણીઓ અને મહાનુભાવો માટે બેઠક આયોજન તેમજ પાસ ઇશ્યુ કરવા અંગે સંબંધિત અધિકારીઓને નિર્દેશ આપ્યા હતા.

આ ઉપરાંત વીજ પુરવઠો જળવાઈ રહે તે માટે સભા સ્થળ, સ્ટેજ અને હેલિપેડ પર અવિરત વીજ પુરવઠો તથા જનરેટર સેટની સુવિધા રાખવા, બીએસએનએલ અને એનઆઈસી દ્વારા હોટલાઇન બ્રોડબેન્ડની કનેક્ટિવિટી પૂરી પાડવા તેમજ સફાઈ, પીવાનું પાણી અને ફૂડ સેફ્ટી સહિતની જરૂરી વ્યવસ્થાઓ કરવા સુચના આપવામાં આવી હતી.