નવસારી મનપાના મેયર અને મ્યુ. કમિશ્નરે ખંભલાવ પાંજરાપોળની સમીક્ષા કરી સૂચનો આપ્યા

200થી વધુ ગાયોની સંભાળ, ચારા-પાણી અને મળ-યુરિન નિકાલની વ્યવસ્થા સુધારવા સૂચના; ધર્મિનગરના GVP પોઇન્ટના રૂપાંતરણની પણ સમીક્ષા

નવસારી : નવસારી મહાનગરપાલિકા વિસ્તારમાં વિકાસ, સ્વચ્છતા, આરોગ્ય અને નાગરિક સુવિધાઓને વધુ સુદૃઢ બનાવવા મેયર અશોકભાઈ ધોરાજીયા તથા મ્યુનિસિપલ કમિશનર જયેશ ઉપાધ્યાય દ્વારા રૂટિન ફિલ્ડ વિઝિટ કરવામાં આવી હતી.

વિઝિટ દરમિયાન ખંભલાવ કેટલ પોન્ડની મુલાકાત લઈ ત્યાં ચાલી રહેલી વ્યવસ્થાની સમીક્ષા કરવામાં આવી હતી. હાલ કેટલ પોન્ડ ખાતે અંદાજે 200થી વધુ ગાયોની દેખરેખ રાખવામાં આવી રહી છે. મેયર અશોકભાઈ ધોરાજીયાએ ગાયોની સંભાળ, ચારા-પાણી અને અન્ય સુવિધાઓ અંગે માહિતી મેળવી હતી.

મળ અને યુરિનના યોગ્ય નિકાલ માટે વ્યવસ્થિત સિસ્ટમ ઉભી કરવા, ચારા માટે શેડ બનાવવાની સુવિધા વિકસાવવા તેમજ ગાયોની દેખરેખ માટે જરૂરી કર્મચારીઓની સંખ્યા વધારવા અને તેમના રહેવાની યોગ્ય વ્યવસ્થા કરવા સૂચનાઓ આપવામાં આવી હતી.

આ ઉપરાંત હાલની આર્કિટેક્ચરલ ડિઝાઇનમાં જરૂરી સુધારા કરવા અને કમ્પાઉન્ડ વોલ સહિતની કામગીરી અંગે સંબંધિત એન્જિનિયરો તથા અધિકારીઓને માર્ગદર્શન આપવામાં આવ્યું હતું.

ત્યારબાદ મ્યુનિસિપલ કમિશનર જયેશ ઉપાધ્યાયે સ્વચ્છતા અભિયાન અંતર્ગત ધર્મિનગર ખાતેના ગાર્બેજ વલ્નરેબલ પોઇન્ટના રૂપાંતરણની કામગીરીની સમીક્ષા કરી હતી. અગાઉના GVP પોઇન્ટના સ્થાને હાલ સુંદર ગાર્ડન, હરિયાળી તેમજ નાગરિકો માટે બેઠક વ્યવસ્થા વિકસાવવામાં આવી છે.

કમિશનરે શહેરના અન્ય સ્થળોએ પણ જાહેર સ્થળોના વિકાસ અને સ્વચ્છતા માટે આ જ પ્રકારનું આયોજન કરવા સંબંધિત નાયબ મ્યુનિસિપલ કમિશનર, એન્જિનિયરો, કોન્ટ્રાક્ટરો અને અધિકારીઓને જરૂરી સૂચનાઓ આપી હતી.