નવસારી મ્યુ. કમિશનરે વડાપ્રધાનના કાર્યક્રમના રૂટની ફિલ્ડ વિઝિટ કરી, ગ્રીડ અંડરબ્રિજ કામગીરીની સમીક્ષા

હેલિપેડથી કમલમ કાર્યાલય સુધીની વ્યવસ્થાઓનું નિરીક્ષણ; બારડોલી-નવસારી માર્ગ વહેલી તકે ખુલ્લો કરવા સૂચના

નવસારી : નવસારી મહાનગરપાલિકા કમિશનર જયેશ ઉપાધ્યાય દ્વારા આજે વડાપ્રધાન નરેન્દ્રભાઈ મોદીના કાર્યક્રમને અનુલક્ષીને હેલિપેડ સ્થળથી કમલમ મુખ્ય કાર્યાલય સુધીના સમગ્ર રૂટની વ્યવસ્થાની સ્થળ પર જઈ સમીક્ષા કરવામાં આવી હતી.

આ દરમિયાન વોટરપ્રૂફ ડોમ, પાર્કિંગ વ્યવસ્થા, રૂટની સ્વચ્છતા, માર્ગ પરના બિનજરૂરી અવરોધો સહિતની વિવિધ વ્યવસ્થાઓનું નિરીક્ષણ કરી સંબંધિત વિભાગના અધિકારીઓને જરૂરી સૂચનાઓ અને માર્ગદર્શન આપવામાં આવ્યું હતું.

ફિલ્ડ વિઝિટ દરમિયાન કમલમ મુખ્ય કાર્યાલય તરફના માર્ગ સહિત કાર્યક્રમના સમગ્ર રૂટ પર ટ્રાફિક વ્યવસ્થા, સ્વચ્છતા તથા નાગરિકોને કોઈ અગવડતા ન પડે તે માટેના આયોજનની પણ સમીક્ષા કરવામાં આવી હતી. સ્થળ પરની તમામ વ્યવસ્થાઓ સમયસર પૂર્ણ થાય અને સમગ્ર રૂટ સુવ્યવસ્થિત રહે તે માટે સંબંધિત અધિકારીઓને જરૂરી સંકલન જાળવવા તેમજ બાકી રહેલી કામગીરીને પ્રાથમિકતાના ધોરણે પૂર્ણ કરવા સૂચના આપવામાં આવી હતી.

ત્યારબાદ કમિશનરે ગ્રીડ ખાતે ચાલી રહેલી અંડરબ્રિજ ડેવલપમેન્ટ કામગીરીનું પણ સ્થળ નિરીક્ષણ કર્યું હતું. ખાસ કરીને બારડોલીથી નવસારી શહેર તરફ જોડાતા માર્ગને શક્ય તેટલી વહેલી તકે વાહનવ્યવહાર માટે ખુલ્લો કરી ટ્રાફિકની સમસ્યાઓ હળવી થાય તે દિશામાં ઇજનેર વિભાગને જરૂરી માર્ગદર્શન આપવામાં આવ્યું હતું.

આ ઉપરાંત આગામી આયોજનની તૈયારીઓના ભાગરૂપે ગ્રીડ સર્કલ પોઇન્ટનું પણ નિરીક્ષણ કરવામાં આવ્યું હતું. સમગ્ર વિઝિટ દરમિયાન નાયબ મ્યુનિસિપલ કમિશનરો, સંબંધિત અધિકારીઓ તથા કર્મચારીઓ ઉપસ્થિત રહી કામગીરી અંગે જરૂરી સંકલન કર્યું હતું.