નવસારીમાં દાદાભાઈ નવરોજીની 202મી જન્મજયંતિની ભાવભેર ઉજવણી

લક્ષ્મણ હોલ ખાતે પુષ્પાંજલિ અર્પણ કરી મહાનુભાવોએ રાષ્ટ્રપ્રેમ અને સ્વરાજના વિચારોને યાદ કર્યા

નવસારી : ભારતના સ્વાતંત્ર્ય સંગ્રામના પ્રખર નેતા, ‘સ્વરાજ’ શબ્દના ઉદ્ઘોષક અને નવસારીના પનોતા પુત્ર દાદાભાઈ નવરોજીની 202મી જન્મજયંતિ નિમિત્તે નવસારી મહાનગરપાલિકા તથા દાદાભાઈ નવરોજી સ્મૃતિ વ્યાખ્યાનમાળા સમિતિ દ્વારા લક્ષ્મણ હોલ ખાતે ભાવભર્યો કાર્યક્રમ યોજાયો હતો.

કાર્યક્રમમાં નવસારી મહાનગરપાલિકાના મેયર અશોક ધોરાજીયા, નવસારીના ધારાસભ્ય રાકેશભાઈ દેસાઈ, ડેપ્યુટી મેયર કેયુરીબેન દેસાઈ, નવસારી જિલ્લા સંગઠન પ્રમુખ ભૂરાલાલ શાહ, મનપા સ્થાયી સમિતિના ચેરમેન મુકેશ અગ્રવાલ, મ્યુનિસિપલ કમિશનર જયેશ ઉપાધ્યાય, દાદાભાઈ નવરોજી સ્મૃતિ વ્યાખ્યાનમાળા સમિતિના ચેરમેન પ્રોફેસર જશુભાઈ એમ. નાયક, ઈન્ડિયન રેડક્રોસ સોસાયટી નવસારીના ચેરમેન ડૉ. ધર્મેશ કાપડિયા તથા મનપા સાંસ્કૃતિક વિભાગના ચેરમેન પરેશ ભારતીયા સહિતના મહાનુભાવો ઉપસ્થિત રહ્યા હતા.

આ પ્રસંગે લક્ષ્મણ હોલ ખાતે દાદાભાઈ નવરોજીની પ્રતિમાને પુષ્પાંજલિ અર્પણ કરી ભાવભીની શ્રદ્ધાંજલિ પાઠવવામાં આવી હતી. સાથે જ નવસારીની વિવિધ શાળાઓના આચાર્યો, શિક્ષકો, એન.એસ.એસ., જે.આર.સી. તથા રેડક્રોસના સ્વયંસેવકો અને વિદ્યાર્થીઓ પણ કાર્યક્રમમાં જોડાયા હતા.

મહાનુભાવોએ દાદાભાઈ નવરોજીના રાષ્ટ્રપ્રેમ, સ્વરાજના વિચાર અને ભારતની આઝાદીની ચળવળમાં તેમના ઐતિહાસિક યોગદાનને યાદ કર્યું હતું. યુવા પેઢીને તેમના જીવન અને વિચારોમાંથી પ્રેરણા લેવા અનુરોધ કરવામાં આવ્યો હતો.

કાર્યક્રમ દરમિયાન વિદ્યાર્થીઓએ દાદાભાઈ નવરોજીના રાષ્ટ્રભક્તિપૂર્ણ વિચારો અને સંદેશને ઉજાગર કર્યા હતા. સમગ્ર કાર્યક્રમ દરમિયાન દેશભક્તિ અને રાષ્ટ્રપ્રેમનો માહોલ જોવા મળ્યો હતો.

અંતે ઉપસ્થિત સૌએ દાદાભાઈ નવરોજીને શ્રદ્ધાપૂર્વક નમન કરી તેમના આદર્શોને જીવનમાં ઉતારવાનો સંકલ્પ કર્યો હતો.