નવસારી નગર પ્રાથમિક શિક્ષણ સમિતિ દ્વારા શિક્ષક દિન નિમિત્તે નિવૃત્ત અને પ્રતિભાશાળી શિક્ષકોનું સન્માન

શ્રેષ્ઠ કામગીરી કરનાર શિક્ષકો અને કર્મચારીઓને મોમેન્ટો-સન્માનપત્ર અર્પણ; ડો. જય વશીનું પ્રેરણાદાયી વક્તવ્ય

નવસારી : નવસારી નગર પ્રાથમિક શિક્ષણ સમિતિ દ્વારા શિક્ષક દિનના અવસરે વિશેષ સન્માન કાર્યક્રમનું આયોજન કરવામાં આવ્યું હતું. જેમાં નિવૃત્ત શિક્ષકો, પ્રતિભાશાળી શિક્ષકો તેમજ ઉત્કૃષ્ટ સેવા આપનાર કર્મચારીઓનું જાહેરમાં સન્માન કરવામાં આવ્યું હતું.

કાર્યક્રમની શરૂઆત આમંત્રિત મહેમાનોના હસ્તે દીપ પ્રાગટ્યથી કરવામાં આવી હતી. ત્યારબાદ મિશ્ર શાળા નં. 2ના બાળવૃંદ અને શિક્ષક પ્રવીણભાઈ દ્વારા પ્રાર્થના રજૂ કરવામાં આવી હતી, જ્યારે કન્યા શાળા નં. 1ની વિદ્યાર્થીનીઓએ સ્વાગત નૃત્ય રજૂ કર્યું હતું.

સમિતિના અધ્યક્ષ અજયભાઈ દેસાઈએ શિક્ષક દિનનું મહત્વ સમજાવતું પ્રાસંગિક ઉદબોધન કર્યું હતું. કાર્યક્રમમાં નવસારીના ધારાસભ્ય રાકેશભાઈ દેસાઈ, ડેપ્યુટી મેયર કેયુરીબેન દેસાઈ, પક્ષના નેતા નરેશભાઈ પુરોહિત તેમજ શિક્ષક, વક્તા અને લેખક ડો. જય વશીનું મોમેન્ટો અર્પણ કરી સ્વાગત કરવામાં આવ્યું હતું.

આ પ્રસંગે મહેમાનોના હસ્તે નિવૃત્ત શિક્ષકો, શ્રેષ્ઠ કામગીરી કરનાર પ્રતિભાશાળી શિક્ષકો અને કર્મચારીઓને મોમેન્ટો તથા સન્માનપત્ર આપી બહુમાન કરવામાં આવ્યું હતું. ધારાસભ્ય રાકેશભાઈ દેસાઈએ ઉપસ્થિત શિક્ષકોને શિક્ષક દિન અનુરૂપ શુભેચ્છા અને આશીર્વચન પાઠવ્યા હતા.

કાર્યક્રમના મુખ્ય વક્તા ડો. જય વશીએ વર્તમાન શિક્ષણ પદ્ધતિને અનુરૂપ ઉદાહરણો, હાસ્ય, સંવેદના અને ગંભીર ચિંતન સાથે પ્રેરણાદાયી વક્તવ્ય રજૂ કર્યું હતું. નિવૃત્ત શિક્ષક જગદીશભાઈ પટેલ અને લીલાબેન પટેલે પોતાના સેવાકાળના યાદગાર અનુભવો પણ રજૂ કર્યા હતા.

કાર્યક્રમના અંતે શાસનાધિકારી જગદીપ મકવાણાએ ઉપસ્થિત મહેમાનો, શિક્ષકો અને કર્મચારીઓનો આભાર વ્યક્ત કર્યો હતો.