નવસારીમાં લક્ઝરી કારની ટક્કરે લારીચાલકના મોતના કેસમાં આરોપી યુવક જ્યુડિશિયલ કસ્ટડીમાં

નશાની હાલતમાં કાર ચલાવ્યાનો આરોપ; શિવાંગ પટેલ સામે અગાઉ વિજલપોર, નવસારી ટાઉન અને જલાલપોર પોલીસ મથકોમાં પણ ગુનાઓ નોંધાયા હોવાનું સામે આવ્યું

નવસારી : ગાંધીસ્મૃતિ ઓવરબ્રિજથી એરૂ ચાર રસ્તા તરફના માર્ગ પર લક્ઝરી કારની ટક્કરે લારીચાલક આધેડના મોતના કેસમાં ઝડપાયેલા આરોપી શિવાંગ ભરતભાઈ પટેલને કોર્ટે જ્યુડિશિયલ કસ્ટડીમાં મોકલવાનો હુકમ કર્યો છે. આરોપી સામે અગાઉ પણ વિવિધ પોલીસ મથકોમાં ગુનાઓ નોંધાયા હોવાનું સામે આવ્યું છે.

ગત ૨૬મીએ રાત્રે મૂળ ઉત્તર પ્રદેશના જોનપુર જિલ્લાના બદલાપુર તાલુકાના ભગવાનપુર ગામના અને હાલ જલાલપોરના એરૂ ચાર રસ્તા નજીક સીતારામનગર સોસાયટીમાં રહેતા અરૂણભાઈ દેવશંકર ઉપાધ્યાય (ઉં.વ. ૫૫) અબ્રામા રોડ પર રસ્તો ઓળંગી રહ્યા હતા.

તે સમયે જલાલપોરની આર.આર. પાર્ક સોસાયટીમાં રહેતા શિવાંગ ભરતભાઈ પટેલે સફેદ રંગની ઓડી ક્યુ-૩ ૨.૦ કાર (નં. જીજે-૨૧-એએચ-૯૩૪૭) પૂરઝડપે અને ગફલતભરી રીતે હંકારી અરૂણભાઈને ટક્કર મારી હોવાનો આરોપ છે. આરોપી નશાની હાલતમાં કાર ચલાવી રહ્યો હોવાનું પણ જણાવાયું છે.

ટક્કરને કારણે અરૂણભાઈને શરીરે તથા માથાના ભાગે ગંભીર ઈજાઓ થતાં તેમનું ઘટનાસ્થળે જ મોત નીપજ્યું હતું. આ ઘટનામાં જલાલપોર પોલીસે શિવાંગ પટેલને ઝડપી પાડી કોર્ટમાં રજૂ કર્યો હતો. કોર્ટે તેને જ્યુડિશિયલ કસ્ટડીમાં મોકલવાનો હુકમ કર્યો હતો.

આરોપી શિવાંગ પટેલ સામે અગાઉ વિજલપોર, નવસારી ટાઉન તથા જલાલપોર પોલીસ મથકોમાં પણ ગુનાઓ નોંધાયા હોવાનું સામે આવ્યું છે.