નવસારીમાં મેયર અને મ્યુનિસિપલ કમિશનરે વિવિધ વિસ્તારોની મુલાકાત લઈ વિકાસકામોની સમીક્ષા કરી

એરૂમાં ડ્રેનેજ લાઇન અને વોટર ટ્રીટમેન્ટ પ્લાન્ટ, હેરિટેજ રોડ, એરૂ સર્કલ તથા જલાલપોર થાણા તળાવની કામગીરીનું નિરીક્ષણ; અધિકારીઓ અને કોન્ટ્રાક્ટરોને જરૂરી સૂચનાઓ અપાઈ

નવસારી : શહેરમાં નાગરિકોને વધુ સુવિધાઓ ઉપલબ્ધ થાય અને વિવિધ વિકાસકામો સમયબદ્ધ તથા ગુણવત્તાસભર રીતે પૂર્ણ થાય તે હેતુથી નવસારી મહાનગરપાલિકાના મેયર અશોકભાઈ ધોરાજીયા અને મ્યુનિસિપલ કમિશનર જયેશ ઉપાધ્યાયે શહેરના વિવિધ વિસ્તારોની સ્થળ મુલાકાત લીધી હતી. મુલાકાત દરમિયાન વિકાસકામોની સઘન સમીક્ષા કરી સંબંધિત અધિકારીઓ પાસેથી કામગીરીની પ્રગતિ, ટેકનિકલ પાસાઓ તથા જરૂરી સુવિધાઓ અંગે વિગતો મેળવી સ્થળ પર જ માર્ગદર્શન આપવામાં આવ્યું હતું.

પ્રથમ તબક્કે એરૂ ગામ ખાતે નવી ડ્રેનેજ લાઇન નાખવાની કામગીરી તથા નવા વોટર ટ્રીટમેન્ટ પ્લાન્ટની કામગીરીનું નિરીક્ષણ કરવામાં આવ્યું હતું. બંને કામો અંગે અધિકારીઓ સાથે વિગતવાર ચર્ચા કરી પ્રગતિની સમીક્ષા કરવામાં આવી હતી. ડ્રેનેજ વ્યવસ્થા વધુ સુદૃઢ બને અને પાણીનું વ્યવસ્થાપન વધુ અસરકારક થાય તે માટે ચાલી રહેલી કામગીરી સમયસર તથા ગુણવત્તાનાં ધોરણો જાળવીને પૂર્ણ કરવા સૂચનાઓ આપવામાં આવી હતી.

ત્યારબાદ એરૂ ચાર રસ્તાથી વિજલપોર ફાટક સુધી ચાલી રહેલી હેરિટેજ રોડની કામગીરીનું નિરીક્ષણ કરવામાં આવ્યું હતું. માર્ગના વિવિધ ભાગોમાં ચાલી રહેલાં કામો, વિકાસની પ્રગતિ તથા નાગરિકોને ઉપલબ્ધ થનારી સુવિધાઓ અંગે સ્થળ પર સમીક્ષા કરાઈ હતી.

આ સાથે એરૂ સર્કલના વિકાસ અંગે પણ વિશેષ ચર્ચા કરવામાં આવી હતી. સર્કલના વિકાસમાં ટ્રાફિક વ્યવસ્થા, સૌંદર્યીકરણ તથા જાહેર સુવિધાઓને ધ્યાનમાં રાખીને આયોજન કરવા સંબંધિત અધિકારીઓને માર્ગદર્શન આપવામાં આવ્યું હતું.

મુલાકાતના અંતિમ તબક્કે જલાલપોર થાણા તળાવ ખાતે ચાલી રહેલી વિકાસ કામગીરીનું નિરીક્ષણ કરવામાં આવ્યું હતું. કામગીરીની ગુણવત્તા તથા પ્રગતિની સમીક્ષા કરીને સ્થળ પર ઉપસ્થિત કોન્ટ્રાક્ટરોને જરૂરી સૂચનાઓ આપવામાં આવી હતી.

સમગ્ર સ્થળ મુલાકાત દરમિયાન સ્થાનિક કોર્પોરેટર, નાયબ મ્યુનિસિપલ કમિશનર, ઈજનેર વિભાગના અધિકારીઓ તથા કર્મચારીઓ ઉપસ્થિત રહ્યા હતા. શહેરના સર્વાંગી વિકાસને વેગ આપવા અને નાગરિકલક્ષી કામગીરી ગુણવત્તાસભર રીતે પૂર્ણ કરવા મહાનગરપાલિકા દ્વારા સતત સ્થળ મુલાકાત લઈ કામગીરીની સમીક્ષા કરવામાં આવી રહી છે.