નવસારીમાં વોર્ડ નં. 13માં પૂરથી થયેલી નુકસાનીની બાકી સહાય ચૂકવવા માંગ

પાત્ર પૂરપીડિતોને સહાય ચૂકવવા કોર્પોરેટર વિજયભાઈ રાઠોડે જિલ્લા કલેક્ટરને આવેદનપત્ર પાઠવ્યું

નવસારી : નવસારીમાં વોર્ડ નં. 13માં પૂરથી થયેલી નુકસાનીની બાકી સહાય પૂરપીડિતોને ચૂકવવાની માંગ કરી નવસારી મનપાના વોર્ડ નં. 13ના કોર્પોરેટરે જિલ્લા કલેક્ટરને આવેદનપત્ર પાઠવ્યું છે.

નવસારી મનપાના વોર્ડ નં. 13ના કોર્પોરેટર અને ગૃહ નિર્માણ-સ્લમ ઈમ્પ્રુવમેન્ટ સમિતિના ચેરમેન વિજયભાઈ રાઠોડે જિલ્લા કલેક્ટરને પાઠવેલા આવેદનપત્રમાં જણાવ્યું હતું કે, નવસારી શહેરના વોર્ડ નં. 13 રેલ રાહત કોલોની, રામજી ખત્રી વિસ્તારમાં પૂર દરમિયાન અનેક પરિવારોને ઘરવખરી તથા અન્ય માલસામાનની નુકસાની થઈ હતી. પૂરના સમયે સંબંધિત સરકારી અધિકારીઓ દ્વારા અસરગ્રસ્ત વિસ્તારમાં સ્થળ પર જઈને સર્વે કરવામાં આવ્યો હતો અને લાભાર્થીઓની યાદી તૈયાર કરવામાં આવી હતી.

છતાં કેટલાક પાત્ર પૂરપીડિત પરિવારોને આજદિન સુધી મળવાપાત્ર નુકસાની વળતરની સરકારી સહાય પ્રાપ્ત થઈ નથી. જેથી સર્વે કરી તૈયાર કરાયેલી યાદી મેળવી રેલ રાહત કોલોની, રામજી ખત્રી વિસ્તારમાં સ્થળ પર ફરીથી જરૂરી ચકાસણી કરાવવામાં આવે અને પૂરપીડિતોની સહાય કોઈ કારણસર બાકી રહી ગઈ હોય તો તેમના બેંક ખાતાની વિગતો સહિત જરૂરી દસ્તાવેજોની ચકાસણી કરી પાત્ર લાભાર્થીઓને મળવાપાત્ર સહાયની કાર્યવાહી તાત્કાલિક પૂર્ણ કરવામાં આવે તેવી માંગ કરવામાં આવી છે.

કોઈ પૂરપીડિતનું નામ યાદીમાં હોવા છતાં બેંક વિગતો અથવા અન્ય ટેકનિકલ કારણોસર સહાય અટકેલી હોય તો તે બાબતની પણ તપાસ કરી જરૂરી સુધારા કરાવી સહાયની રકમ સીધી લાભાર્થીના બેંક ખાતામાં જમા કરવાની માંગ કરી છે. કુદરતી આપત્તિમાં નુકસાન ભોગવનાર પરિવારોને લાંબા સમય સુધી સરકારી સહાયથી વંચિત રહેવું ન પડે તે માટે માનવતાના ધોરણે તાત્કાલિક અને હકારાત્મક કાર્યવાહી કરવાની માંગ કરી છે.