વડાપ્રધાનના કાર્યક્રમ બાદ નવસારી મનપાના મેયર સહિતના કોર્પોરેટરોએ કચરો ઉઠાવ્યો

કાર્યક્રમ પૂર્ણ થયા બાદ જનપ્રતિનિધિઓ અને કાર્યકરો સ્વયં સફાઈમાં જોડાયા, સ્વચ્છતાનો સંદેશ આપ્યો

નવસારી : આજે વડાપ્રધાનના હસ્તે નમો કમલમના લોકાર્પણ કાર્યક્રમ બાદ સ્વચ્છતાનો સંદેશ આપવામાં આવ્યો હતો. કાર્યક્રમ સ્થળે સ્વચ્છતાના સંદેશને આત્મસાત્ કરીને કાર્યક્રમ પૂર્ણ થયા બાદ નવસારી મનપાના મેયર અશોકભાઈ ધોરાજીયા, ડેપ્યુટી મેયર કેયુરીબેન દેસાઈ, સ્થાયી સમિતિના ચેરમેન મુકેશ અગ્રવાલ, શાસક પક્ષના નેતા નરેશ પુરોહિત, દંડક રાકેશભાઈ પટેલ તેમજ કોર્પોરેટરો સહિત અન્ય કાર્યકરો સ્વયં સફાઈ કામગીરીમાં જોડાયા હતા.

સભા દરમિયાન ઉપયોગમાં લેવાયેલા પાણીના ગ્લાસ, કપ, કાગળ તથા અન્ય વપરાશની સામગ્રીના કચરાને ભાજપના હોદ્દેદારો અને કોર્પોરેટરોએ જાતે ઉઠાવી સ્થળની સફાઈ કરી હતી.

જનપ્રતિનિધિઓ દ્વારા હાથ ધરવામાં આવેલી આ કામગીરી દ્વારા ‘સ્વચ્છતા માત્ર તંત્રની જવાબદારી નથી, પરંતુ દરેક નાગરિકની સામૂહિક જવાબદારી છે’ તેવો પ્રેરણાદાયી સંદેશ આપવામાં આવ્યો હતો.