વાર્ષિક ઈ-કેવાયસી વગર પીએમ-કિસાન યોજનાના હપ્તા બંધ થશે

1લી એપ્રિલ-2026 બાદ બાયોમેટ્રિક અથવા ફેસ ઓથેન્ટિકેશનથી ઈ-કેવાયસી કરાવવું ફરજિયાત

વાર્ષિક સહાય ₹6,000 | 3 હપ્તા | દર નાણાકીય વર્ષે e-KYC ફરજિયાત

નવસારી : ભારત સરકાર દ્વારા વર્ષ-2019થી પ્રધાનમંત્રી કિસાન સન્માન નિધિ (પીએમ-કિસાન) યોજના અમલમાં મૂકવામાં આવી છે. આ યોજના હેઠળ પાત્ર ખેડૂત પરિવારોને દર વર્ષે રૂ. 6,000ની સહાય ત્રણ સમાન હપ્તામાં સીધી બેંક ખાતામાં ડીબીટી મારફતે ચૂકવવામાં આવે છે.

ભારત સરકારની વર્તમાન સૂચના અનુસાર પીએમ-કિસાન યોજનાના તમામ લાભાર્થી ખેડૂતો માટે દર નાણાકીય વર્ષે વાર્ષિક ઈ-કેવાયસી કરાવવું ફરજિયાત છે. નાણાકીય વર્ષના પ્રથમ હપ્તા (એપ્રિલ-જુલાઈ)ના રિલીઝ પૂર્વે બાયોમેટ્રિક અથવા ફેસ ઓથેન્ટિકેશન દ્વારા ઈ-કેવાયસી પૂર્ણ કરાવવાની રહેશે. અગાઉના નાણાકીય વર્ષમાં કરાવેલી ઈ-કેવાયસી આગામી નાણાકીય વર્ષ માટે માન્ય ગણાશે નહીં. તેથી દર નાણાકીય વર્ષે નિર્ધારિત સમયમર્યાદામાં વાર્ષિક ઈ-કેવાયસી પુનઃ પૂર્ણ કરાવવી જરૂરી છે.

નવસારી જિલ્લાના જે લાભાર્થી ખેડૂતોના સ્ટેટસમાં “ઈ-કેવાયસી : યસ” જોવા મળે છે, પરંતુ જેમણે ગત 1લી એપ્રિલ-2026 પછી બાયોમેટ્રિક અથવા ફેસ ઓથેન્ટિકેશન દ્વારા વાર્ષિક ઈ-કેવાયસી કરાવેલ નથી, તેવા તમામ લાભાર્થી ખેડૂતોએ બાયોમેટ્રિક/ફેસ ઓથેન્ટિકેશન દ્વારા વાર્ષિક ઈ-કેવાયસી ફરજિયાત કરાવવાની રહેશે.

વાર્ષિક e-KYC પૂર્ણ નહીં થાય તો આગામી PM-Kisan હપ્તામાં અવરોધ આવી શકે છે.

વાર્ષિક ઈ-કેવાયસી પૂર્ણ નહીં કરાવનાર લાભાર્થીઓને યોજનાનો આગામી હપ્તો મેળવવામાં અવરોધ આવી શકે છે.

નવસારી જિલ્લા ખેતીવાડી અધિકારી દ્વારા જિલ્લાના તમામ પીએમ-કિસાન લાભાર્થી ખેડૂતોને સમયસર વાર્ષિક ઈ-કેવાયસી પૂર્ણ કરાવી યોજનાનો આગામી હપ્તો અવરોધ વિના પ્રાપ્ત કરવા માટે અનુરોધ કરવામાં આવ્યો છે.

ઈ-કેવાયસી માટેની પ્રક્રિયા

પદ્ધતિ 1 — પીએમ-કિસાન મોબાઈલ એપ દ્વારા (ફેસ ઓથેન્ટિકેશન) : લાભાર્થી પોતે એપમાં “લોગીન” → “લોગીન ટાયપ” → “બેનેફિસયરી” વિકલ્પ પસંદ કરી આધાર નંબર/રજીસ્ટ્રેશન નંબરના આધારે ફેસ ઓથેન્ટિકેશન દ્વારા ઈ-કેવાયસી કરી શકશે. આ ઉપરાંત અન્ય 100 લાભાર્થીઓનું પણ ઈ-કેવાયસી કરી શકાશે.

પદ્ધતિ 2 — ગ્રામસેવક / વિલેજ નોડલ ઓફિસર દ્વારા (ફેસ ઓથેન્ટિકેશન) : ગ્રામસેવક અથવા વિલેજ નોડલ ઓફિસર પીએમ-કિસાન મોબાઈલ એપ્લિકેશનનો ઉપયોગ કરીને ફેસ ઓથેન્ટિકેશન દ્વારા લાભાર્થી ખેડૂતોનું ઈ-કેવાયસી કરી શકશે.

પદ્ધતિ 3 — CSC / ઈ-ગ્રામ કેન્દ્ર દ્વારા (બાયોમેટ્રિક ઓથેન્ટિકેશન) : લાભાર્થી પોતાના નજીકના કોમન સર્વિસ સેન્ટર (CSC) અથવા ઈ-ગ્રામ કેન્દ્ર પર જઈ બાયોમેટ્રિક ઓથેન્ટિકેશન દ્વારા ઈ-કેવાયસી કરાવી શકશે.

આથી નવસારી જિલ્લાના તમામ પીએમ-કિસાન લાભાર્થી ખેડૂતોને વહેલી તકે પોતાની વાર્ષિક ઈ-કેવાયસીની સ્થિતિ ચકાસી, જરૂરી હોય તો બાયોમેટ્રિક અથવા ફેસ ઓથેન્ટિકેશન દ્વારા ઈ-કેવાયસી પૂર્ણ કરાવી લેવા જિલ્લા ખેતીવાડી વિભાગ દ્વારા અપીલ કરવામાં આવી છે.