પોષણ માસના સુચારૂ આયોજન અંગે જિલ્લા કલેક્ટરના અધ્યક્ષસ્થાને બેઠક યોજાઈ

“મારી આંગણવાડી : મારી જવાબદારી” મુખ્ય થીમ સાથે 8 ઓક્ટોબર સુધી પોષણ માસની ઉજવણી કરાશે

નવસારી : 9મી સપ્ટેમ્બરથી 8મી ઓક્ટોબર દરમિયાન સમગ્ર ગુજરાત રાજ્યમાં પોષણ માસ-2026ની ઉજવણી કરવામાં આવી રહી છે. તેના સુચારૂ આયોજન અને અસરકારક અમલીકરણના ભાગરૂપે નવસારી જિલ્લા કલેક્ટર મનીષ ગુરવાનીના અધ્યક્ષસ્થાને જિલ્લા કક્ષાની બેઠક યોજાઈ હતી.

બેઠક દરમિયાન કલેક્ટરે પોષણ માસ અંતર્ગત જિલ્લામાં યોજાનારી વિવિધ પ્રવૃત્તિઓનું યોગ્ય આયોજન થાય તેમજ સરકારની પોષણલક્ષી યોજનાઓનો લાભ પાત્ર લાભાર્થીઓ સુધી અસરકારક રીતે પહોંચે તે માટે સંબંધિત અધિકારીઓને જરૂરી માર્ગદર્શન અને સૂચનાઓ આપી હતી.

પોષણ માસ દરમિયાન “મારી આંગણવાડી : મારી જવાબદારી” મુખ્ય થીમ હેઠળ આંગણવાડી કેન્દ્રો મારફતે બાળકો, સગર્ભા મહિલાઓ તથા ધાત્રી માતાઓમાં પોષણ અંગે જાગૃતિ વધારવા વિવિધ જનજાગૃતિ કાર્યક્રમો યોજવામાં આવશે. પોષણના મહત્વ અંગે વ્યાપક લોકજાગૃતિ ફેલાવવા વિવિધ વિભાગો દ્વારા સંકલિત કામગીરી કરવા અંગે પણ બેઠકમાં ચર્ચા કરવામાં આવી હતી.

કલેક્ટરે પોષણ માસની પ્રવૃત્તિઓમાં વધુમાં વધુ જનભાગીદારી સુનિશ્ચિત કરવા તેમજ પોષણ સંબંધિત સંદેશાઓ ગ્રામ્ય અને શહેરી વિસ્તારો સુધી પહોંચાડવા પર ભાર મૂક્યો હતો. આંગણવાડી કાર્યકરો, આરોગ્ય વિભાગ તથા અન્ય સંબંધિત કર્મચારીઓની ભૂમિકા મહત્વપૂર્ણ હોવાનું જણાવી તમામ વિભાગોને પરસ્પર સંકલન સાથે કામગીરી કરવા સૂચના આપવામાં આવી હતી.

બેઠકમાં જિલ્લા વિકાસ અધિકારી કાર્તિક જીવાણી, ICDSના પ્રોગ્રામ ઓફિસર સહિત જિલ્લાના અન્ય વરિષ્ઠ અધિકારીઓ અને સંબંધિત અધિકારી-કર્મચારીઓ ઉપસ્થિત રહ્યા હતા.