સીએનજી અને સ્પેરપાર્ટ્સ મોંઘા થતા નવસારીમાં રીક્ષા ભાડામાં 5 રૂપિયાનો વધારો કરાયો

મોંઘવારીના મારથી બચવા નવસારીમાં રીક્ષા ભાડામાં વધારો કરવા રીક્ષા એસો. મજબુર બન્યું

નવસારી : સીએનજીમાં ભાવ વધારો અને સ્પેરપાર્ટ્સ મોંઘા થતા નવસારી રીક્ષા એસો. ભાડામાં વધારો કરવા માટે મજબુર બન્યું છે. ત્યારે મોંઘવારીના મારથી બચવા માટે નવસારી રીક્ષા એસો. રીક્ષાના ભાડામાં 5 રૂપિયાનો વધારો કર્યો છે.

નવસારીમાં ઘણા લોકો શહેરમાં રીક્ષા ચલાવી પોતાના ઘરનું ગુજરાન ચલાવે છે. રીક્ષા ચાલકો રાત-દિવસ, ઠંડી-ગરમી કે ચોમાસામાં વરસાદની ચિંતા કર્યા વિના રીક્ષા ચલાવી મુસાફરોને તેમના સ્થાને પહોચાડી રહ્યા છે. ખાસ કરીને નવસારી રેલ્વે સ્ટેશન પર ઉતરતા મુસાફરો અને નવસારી એસ.ટી. ડેપોમાં ઉતરતા મુસાફરો માટે રીક્ષા ચાલકો ઘણા લાભદાયી બન્યા છે. ત્યારે રીક્ષા ચાલકોને વધુ કમાણી કરવા માટે વધુમાં વધુ ટ્રીપ મારવી પડે છે. જેના પગલે સી.એન.જી. ગેસનો ઉપયોગ થાય છે. તેમજ જો રીક્ષામાં કોઈ નુકશાની થાય તો તેની મરામત પાછળ પણ ખર્ચ થાય છે. જોકે પહેલા સી.એન.જી.ના ભાવ તેમજ સ્પેરપાર્ટ્સ સહિત મજુરીના ભાવો પણ ઓછા હતા.

9 વર્ષ અગાઉ વર્ષ 2017માં નવસારી રીક્ષા એસો. દ્વારા ભાડામાં સુધારો કરી ભાડાપત્રક બહાર પાડયું હતું. જે ભાડાપત્રક મુજબ જ નવસારીના રીક્ષા ચાલકો મુસાફરો પાસેથી ભાડું વસુલી રહ્યા હતા. પરંતુ ધીરે-ધીરે મોંઘવારીએ જોર પકડ્યું છે. સરકાર ધીમે-ધીમે સી.એન.જી.ના ભાવમાં વધારો કરી રહી હોવાથી આજે સી.એન.જી.નો ભાવ 90 રૂપિયા જેટલો થયો છે. સમય જતા હજી વધવાની સંભાવના છે. બીજી તરફ રીક્ષાને લગતા સ્પેરપાર્ટ્સ પણ મોંઘા થયા છે, જેની સાથે રીક્ષા રીપેર કરનારાઓએ પણ તેમની મજુરીમાં વધારો કરી દીધો છે. ત્યારે નજીવા ભાડામાં ચાલતી રીક્ષાથી રીક્ષા ચાલકો ઉપર આર્થિક બોજો પડી રહ્યો હતો. જેના પગલે નવસારી રીક્ષા એસો.એ રીક્ષા ભાડામાં વધારો કરવાનું નક્કી કર્યું છે.

મોંઘવારીના મારથી બચવા માટે 9 વર્ષ બાદ નવસારી રીક્ષા એસો. દ્વારા રીક્ષા ભાડામાં 5 રૂપિયાનો નજીવો વધારો કર્યો છે. વિવિધ વિસ્તારો સુધી જતી રીક્ષા માટે અલગ-અલગ ભાડાની રકમ નક્કી કરતું ભાડાપત્રક જાહેર કરાયું છે. જેમાં રેગ્યુલર ઓછામાં ઓછું ભાડું 10 રૂપિયા રાખવામાં આવ્યું છે. લાંબા અંતર સુધી જતા મુસાફરો માટે પણ જે વિસ્તાર સુધી જેટલું ભાડું લેવાનું નક્કી કરવામાં આવ્યું છે તે મુજબ જ રીક્ષા ચાલકો ભાડું વસુલશે.

આ સિવાય સ્પેશિયલ ભાડાની રકમ પણ દર્શાવવામાં આવી છે. જેમાં રેલ્વે સ્ટેશનથી માયસાહેબ સુધી 250 રૂપિયા, રેલ્વે સ્ટેશનથી દાંડી 250 રૂપિયા, રેલ્વે સ્ટેશનથી બાબાસ્વામી સુધી 300 રૂપિયા, રેલ્વે સ્ટેશનથી કાસામદીના સુધી 600 રૂપિયા અને રેલ્વે સ્ટેશનથી જલતરંગ સુધી 200 રૂપિયા સ્પેશિયલ ભાડું લેવાશે.