તીઘરામાં તૂટેલા જીવંત વીજ તારને અડતાં દુધાળી ગીર ગાયનું મોત

પશુપાલકને રૂ. ૧ લાખનું નુકસાન; ડીજીવીસીએલની કામગીરી સામે રોષ, વળતર અને વીજ લાઇનની જાળવણીની માંગ

નવસારીના તીઘરા વિસ્તારમાં મેઇન રોડ પરથી પસાર થતી એગ્રીકલ્ચર વીજ લાઇનનો જીવંત તાર તૂટીને રસ્તા પર પડ્યો હતો. આ તારને અડતાં કરંટ લાગવાથી એક દુધાળી ગીર ગાયનું મોત નીપજ્યું હતું.

ઘટનાની જાણ થતાં પશુપાલક આઘાતમાં મુકાયા હતા. આશરે રૂ. ૧ લાખની કિંમતની આ ગાયનું દૂધ વેચીને તેઓ ગુજરાન ચલાવતા હતા. ગાયના મોતથી તેમને મોટું આર્થિક નુકસાન થયું છે.

ઘટનાને પગલે પશુપાલક સહિત ગામજનોએ ડીજીવીસીએલની કામગીરી સામે સવાલો ઉઠાવી રોષ વ્યક્ત કર્યો છે. સ્થાનિકોના જણાવ્યા મુજબ, રસ્તા પર પડેલા જીવંત તારના સંપર્કમાં કોઈ વ્યક્તિ આવી હોત તો તેનો પણ જીવ જોખમમાં મુકાઈ શક્યો હોત.

સ્થાનિકોએ વીજ તાર તૂટવા જેવી ગંભીર સ્થિતિમાં તાત્કાલિક વીજ પુરવઠો બંધ કરવાની તથા અસરગ્રસ્ત પશુપાલકને યોગ્ય વળતર આપવાની માંગ કરી છે. ભવિષ્યમાં આવી ઘટના ન બને તે માટે વીજ લાઇનનું સમયાંતરે નિરીક્ષણ અને જરૂરી જાળવણી કરવાની પણ માંગ ઉઠી છે.