વાંસદાના ઉમરકુઈ ગામે વડની વડવાઈઓ વચ્ચે શિવેશ્વર વડેશ્વર હનુમાનજીનું અનોખું મંદિર

વડની વડવાઈઓથી કુદરતી રીતે આકાર પામેલું આસ્થાનું સ્થળ; માનતા પૂર્ણ થતાં દૂર-દૂરથી ભક્તો દર્શનાર્થે આવે છે

વાંસદા : નવસારી જિલ્લાના વાંસદા તાલુકાના ઉમરકુઈ ગામના ઝાડી ફળિયામાં શિવેશ્વર વડેશ્વર હનુમાનજીનું અનોખું મંદિર આવેલું છે. આ મંદિર વડના વૃક્ષની વડવાઈઓથી કુદરતી રીતે આકાર પામેલું છે.

આ સ્થળને આકાર લેતાં ૩૫થી ૪૦ વર્ષ કે તેથી વધુ સમય થયો હોવાનું જણાવાય છે. કોઈ માનવી દ્વારા બાંધવામાં આવેલા મંદિરને બદલે અહીં વડની વડવાઈઓએ કુદરતી રીતે મંદિરનો આકાર ધારણ કર્યો છે, જે આ સ્થળની વિશેષતા છે.

સ્થાનિક લોકોની આસ્થા મુજબ, અહીં આવતા ભક્તોની મનોકામનાઓ પૂર્ણ થાય છે. માનતા પૂર્ણ થયા બાદ દૂર-દૂરથી ભક્તો દાદાનાં દર્શન કરવા, આશીર્વાદ લેવા અને પોતાની બાધા ચઢાવવા આવે છે.